From Wikipedia, the free encyclopedia
La Dieta de Augsburgu ye'l nome col que se conocen les xuntes de la Dieta Imperial o Reichstag del Sacru Imperiu Romanu Xermánicu na ciudá alemana d'Augsburgu.
Hubo munches sesiones, dende l'añu 952 hasta 1582; pero les más importantes fueron les que se celebraron nos años centrales del sieglu XVI, el periodu culminante de la Reforma protestante y les guerres relixoses ente católicos y protestantes.
Tres la Dieta de Worms de 1521, onde l'emperador Carlos V pretendiera acabar con Lutero por aciu l'edictu de Worms, hubo otres xuntes de la Dieta en Núremberg y Speyer (onde la Protesta de los luteranos dio orixe a la denominación "protestante").
Cola sesión de Augsburgu de 1530 intentábase aselar les crecientes tensiones ente católicos y protestantes, que presentaron al emperador la Confessio Augustana ("Confesión de Augsburgu", 25 de xunu de 1530), un documentu central pal luteranismu. Un equipu de teólogos católicos realizó una refutación denomada Confutatio Pontificia (3 d'agostu de 1530), que foi respondida por Melanchton cola Apoloxía de la Confesión de Augsburgu (abril-setiembre de 1531).
Tres la so victoria na batalla de Mühlberg sobre la lliga de Esmalcalda, convocóse la sesión 1547/48, denomada geharnischter Reichstag ("Dieta enérxica o encorazada"), por realizase so la presión de los exércitos imperiales apostaos pela redolada. Ellí proclamóse'l Interim de Augsburgu, un decretu imperial que pretendía solucionar el problema relixosu con delles concesiones a los protestantes, pero faciendo prevalecer los criterios de Carlos V, inclusive contra la opinión del Papa.
El Interim, nel so intentu de dar prioridá al catolicismu, foi refugáu por munchos príncipes luteranos, que reactivaron la guerra en 1552 ("Guerra de los Príncipes"). Nesta ocasión la guerra foi-yos favorable, llogrando la reconocencia de les sos pretensiones na Paz de Passau (1552) y na nueva sesión de la Dieta que tuvo llugar en Augsburgu en 1555, y que se sustanció na denomada Paz de Augsburgu. El tratáu reconocía tanto "la vieya relixón" como "la Confessio Augustana",[1] estableciendo'l principiu Cuius regio, eius religio ("a tal rei, tal relixón"), que daba a cada príncipe'l poder de decidir (ente esos dos, con esclusión de cualesquier otra, como la calvinista) la relixón de los sos súbditos, con delles esceiciones (Declaratio Ferdinandei y Reservatum ecclesiasticum). Delles cuestiones quedaron inda pendientes hasta la Guerra de los Trenta Años (1618-1648).[2]
La sesión de 1566 de la Dieta de Augsburgu dio validez a los decretos del Conceyu de Trento pa los Estaos católicos d'Alemaña.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
