Condaos de los Estaos Xuníos

Un condáu, nos Estaos Xuníos, ye una sodivisión política o alministrativa d'un estáu que consiste nún área xeográfica con llendes definíes y dél nivel de control sobro'l so gobiernu^[1]. El términu county úsase, con esti significáu, en 48 de los estaos del país; Louisiana y Alaska tienen sodivisiones funcionalmente equivalentes nomaes, respeutivamente, parish y burough^[1].

Mapa de los Estaos Xuníos, amosando los estaos, estremaos en condaos.

La mayoría los condaos tienen sodivisiones internes, nomaes town o township, municipality (conceyu) o unincorporated area (área non incorporada). Otros, por embargu, nun tienen sodivisiones menores, o inclusive organícense como consolidated city-county (ciudá-condáu consolidada). Delles ciudaes abarquen territorios de varios condaos; el casu estremu ye Nueva York, que ta sodividida en 5 condaos, que reciben na estructura de gobiernu local el nome de boroughs.

La Oficina del Censu de los Estaos Xuníos usa'l términu county equivalent (equivalente a condáu) pa describir entidaes alministratives comparables con condaos, pero que reciben nomes diferentes. Asina, sonlo, pa fines alministrativos y estadísticos, les parroquies (parishes) de Louisiana, los burgos organizaos (organized boroughs) d'Alaska, el Distritu de Columbia, y les ciudaes independientes de los estaos de Virxinia, Maryland, Missouri y Nevada. El territoriu non incorporáu d'Alaska, que recibe'l nome de Alaska Unorganized Burough, divídese en 11 árees censales que son equivalentes, con propósitos estadísticos, a los condaos. En 2020 hai 3.143 condaos y entidaes equivalentes nos 50 estaos y el distritu de Columbia^[2]. Hai otros 100 condaos o equivalentes más nos territorios non estatales del país^[3], lo que fai un total de 3.243 condaos o entidaes equivalentes en tolos Estaos Xuníos. L'estáu con menos condaos ye Delaware, que tien trés, y el que tien más bayura d'ellos ye Texas, con 254.

La capacidá de gobiernu de los condaos ye mui variable nos diferentes estaos. En xeneral, son entidaes alministratives relevantes en tolos estaos sacante Rhode Island y Connecticut, nos que aboliose'l gobiernu condal y caltiénse namái el nome y les llendes tradicionales de los condaos pa cuestiones de calter estadísticu o alministrativu. Massachusetts, pela so banda, retiró-yos la mayoría de les competencies de gobiernu a ocho de los sos 14 condaos. El más pobláu del país ye'l condáu de Los Angeles, en California, con 10.098.052 habitantes^[4], y el mayor en territoriu llenda con él, y ye'l condáu de San Bernardino^[5]. Sicasí, hai cuatro boroughs d'Alaska que tienen más estensión qu'elli.

Los territorios de los Estaos Xuníos nun se sodividen en condaos, pero la Oficina del Censu divídelos n'entidaes equivalentes a condaos. Asina, por exemplu, na Samoa Americana la Oficina del Censu cuenta los distritos y los atolones del país como entidaes equivalentes a condaos, mentantu que lo qu'en Samoa nomen county son consideraes pola Oficina del Censu como entidaes llocales menores, non como condaos^[6].

Historia

Los condaos foron una de les primeres formes de gobiernu llocal establecíes nes Trece Colonies qu'acabaríen formando los Estaos Xuníos orixinales. Virxinia creó los primeros condaos pa descargar de trabayu alministrativu a los funcionarios de la so capital, Jamestown. El so órganu llexislativu, la House of Burgesses (Casa de los Burgueses) dividió primero la colonia, en 1617, en cuatro incorporations (incorporaciones), y dempués, en 1634, n'ocho condaos (nomaos col nome tradicional inglés, shire): James City, Henrico, Charles City, Charles River, Warrosquyoake, Accomac, Elizabeth City y Warwick River^[7]. Maryland estableció'l so primer condáu, el de St. Mary, en 1637, y Massachusetts en 1643. Pennsylvania y Nueva York delegaron una parte importante del poder del gobiernu de la colonia nos gobiernos condales, estableciendo una forma de descentralización alministrativa que valió de guía pa la mayoría de los estaos del país sacante los de Nueva Inglaterra, nos que'l poder de los condaos siguió siendo relativamente débil^[8].

Nel momentu de la independencia los autores de la Constitución nun decidieron la cuestión de la organización del gobiernu llocal, que dexaron en manes de los estaos. Les constituciones d'estos primeros estaos conceptualizaron el gobiernu del condáu como ún de los brazos del gobiernu estatal. Nel sieglu XX el papel de los gobiernos condales fortaleciose, una y bones adquirieron poderes propios y entamaron a formar comisiones encargaes d'aprobar les ordenances llocales aplicables nes sos árees non incorporaes^[9]. Parte de les sos competencies tán delegaes n'entidaes alministratives menores, nomaes township sacante en Nueva York, Nueva Inglaterra y Wisconsin, aú reciben el nome de town. Ye la constitución de cada estáu la que determina si un condáu puede o non anular les decisiones de les sos township en determinaes cuestiones.

El condáu más reciente del país ye la ciudá-condáu consolidada de Broomfield, en Colorado, establecida a partir de partes del territoriu de cuatro condaos en 2001^[10]. Les entidaes equivalentes a condáu más recientes son dellos burgos consolidaos d'Alaska: los de Skagway, establecíu en 2007, Wrangell en 2008 y Petersburg en 2013^[11].

Entidaes equivalentes a condaos

Ciudá-condáu consolidada

Una ciudá-condáu consolidada ye, al tiempu, una ciudá, que ye una corporación municipal, y un condáu, que ye una sodivisión alministrativa d'un estáu, y como talo tien el poder y les responsabilidaes de dambos tipos d'entidaes xurídiques. Hai 40 nel país^[1], ente les que s'inclúin Augusta (Georgia), Denver (Colorado), Honolulu (Ḥawai), Indianapolis (Indiana), Jacksonville (Florida), Louisville (Kentucky), Lexington (Kentucky), Kansas City (Kansas), Nashville (Tennessee), Filadelfia (Pennsylvania) y San Francisco (California). Igualmente, dellos de los burgos d'Alaska xuniéronse coles sos principales ciudaes formando ciudá-burgos consolidaos que son quiciás les ciudaes xeográficamente más estenses del mundu y de les de menor densidá de población. Y la ciudá de Nueva Orleans amestose cola so parroquia (parish) pa formar una ciudá-parroquia consolidada, la New Orleans City Parish.

Equivalentes a condáu

El términu county equivalent (equivalente a condáu) ye utilizáu pola Oficina del Censu de los Estaos Xuníos pa describir divisiones alministratives comparables colos condaos pero nomaes de forma diferente^[12].

• Les árees censales d'Alaska. La mayoría'l territoriu d'Alaska nun pertenez a dengún de los 19 burgos organizaos del estáu. Esta estensión de tierra, mayor que Francia y Alemaña xuntes, recibe'l nome oficial por parte del gobiernu del estáu de Unorganized Borough. Nun tien un gobiernu condal independiente, magar que nel so interior hai delles ciudaes incorporaes con gobiernu propiu, y ye gobernáu pol gobiernu estatal directamente. La Oficina del Censu, en cooperación col gobiernu estatal, sodividió, con propósitos estadísticos y de formación de distritos elecorales, esti territoriu n'once árees censales.
• Les parroquies de Louisiana. L'usu del términu parish (parroquia) pa denomar una entidá territorial con gobiernu llocal propiu remóntase a la dómina del gobiernu colonial español y francés, y fai referencia a la división territorial propia de les diócesis católiques.
• Les ciudaes independientes. Son ciudaes que nun pertenecen llegalmente a dengún condáu. Estrémense de les ciudaes-condáu consolidaes en que nestes, polo menos nominalmente, esiste'l condáu, mentantu que nes ciudae independientes non^[13]. En xunetu de 2013 había 41 ciudaes independientes nel país: les 38 ciudaes de Virxinia, nel que por llei estatal cualquier territoriu incorporáu como ciudá queda fuera de la xurisdicción del condáu del que formaba parte'l so territoriu^[14], y amás les de Baltimore, Carson City (Nevada) y Saint Louis (Missouri).
• El Distritu de Columbia, que tien un estatus xurídicu especial y nun ta embaxu la xurisdicción de dengún estáu. La ciudá de Washington abarca tol territoriu del distritu que, acordies cola sección 8ª del artículu 1º de la Constitución de los Estaos Xuníos, ta embaxu la xurisdicción del Congresu. Cuando foi creáu en 1801 el distritu comprendía dos condaos y trés ciudaes. En 1846 el condáu d'Alexandria (qu'anguaño forma'l condáu d'Arlington y una parte de la ciudá independiente d'Alexandria), incluyendo la ciudá homónima, foi devueltu a Virxinia. En 1871 les trés entidaes que quedaben, les ciudaes de Washington y Georgetown y el condáu de Washington, que comprendía tol territoriu del distritu, amestáronse a traviés d'una llei del Congresu nel gobiernu consolidáu del distritu de Columbia. Otru decretu, de 1895, disolvió la ciudá de Georgetown.

Les ciudaes-condáu consolidaes nun son entidaes equivalentes a condaos pa fines alministrativos; una y bones esisten, polo menos nominalmente, tantu la ciudá como'l condáu, son clasificaes como condaos. Eso ye válido tamién pa los boroughs de Nueva York, caún de los cuales ye un condáu del estáu de Nueva York: Manhattan (condáu de Nueva York), Bronx (condáu de Bronx), Queens (condáu de Queens), Brooklyn (condáu de Kings) y Staten Island (condáu de Richmond).

Territorios

Nun hai condaos nos territorios de los Estaos Xuníos. Samoa Americana tien los sos propios condaos, que nun son reconocidos como talos pola Oficina del Censu, que los toma como entidaes llocales menores^[3]. La mayoría de los territorios sodivídense en conceyos o xunidaes similares, que funcionen como equivalentes a condáu a efectos estadísticos. Ente ellos inclúinse^[3][15]:

• Los 78 conceyos de Puertu Ricu
• Les trés islles principales de les Islles Vírxenes Americanes
• Guam como entidá única
• Los cuatro conceyos de les Islles Marianes del Norte
• Los trés distritos de Samoa Americana
• Los dos atolones de Samoa Americana
• Les nueve islles de les Islles Perifériques Menores de los Estaos Xuníos^[16].

Gobiernu

Organización

La estructura y competencies del gobiernu d'un condáu pueden tar definíes pola llei xeneral del estáu o pola carta o estatutu específicu d'esi condáu. Los estaos pueden permitir la esistencia namái de condaos suxetos a la llei xeneral, de condaos con estatutu propiu, o bien que pueda haber de los dos tipos nel so territoriu. En xeneral los condaos suxetos a una llei estatal xeneral tienen menos autonomía que los que tienen carta propia^[17]. Los condaos tán gobernaos, xeneralmente, por un garapiellu de funcionarios elixíos polos habitantes, que puede recibir nomes perestremaos: comisión del condáu, cuerpu de supervisores, corte de comisionaos, conseyu del condáu, corte del condáu... El día a día de l'actividá del condáu suele tar supervisáu por un conseyu executivu electu, o bien por un alministrador o xefe alministrativu que rinde cuentes ente esi conseyu.

En munchos condaos el conseyu encargáu del gobiernu condal exerz funciones que trescienden la tradicional división del gobiernu en trés poderes. Asina, tien el poder de llexislar les ordenances que regulen la vida del condáu en delles materies, tien el poder executivu de poneles en práctica y supervisales, y tien un poder cuasi-xudicial en determinaes cuestiones concretes. En munchos estaos, amás, hai dellos cargos del condáu que son elixíos n'eleiciones independientes del conseyu del condáu y nun pueden ser cesaos por elli: el secretariu (county clerk), el tesoreru, el sheriff... Los fiscales del distrito son funcionarios de ámbitu estatal, pero en munchos estaos les llendes de los distritos xudiciales superpónense a les de los condaos.

La población na que s'alluga l'alministración del condáu, y el edificiu que-y fai de sede, aveza a ser nomada sede del condáu (county seat, o tamién parish seat en Louisiana, borough seat n'Alaska y shire town en dellos condaos de Nueva Inglaterra). Esta sede suel tar nún conceyu, pero dellos condaos tienen múltiples sedes o nun tienen nenguna. Nos condaos nos que nun hai conceyos incorporaos un asentamientu grande puede facer les veces de sede del condáu.

Los condaos tienen funciones gubernamentales importantes en tolos estaos sacante Rhode Island y Connecticut. L'estáu de Massachusetts esanició la mayoría de les funciones del gobiernu d'ocho de los sos catorce condaos.^[18][19][20]

Competencies de gobiernu

El poder de los gobiernos condales varía enforma d'un estáu a otro, como tamién lo fai la rellación ente los condaos y les ciudaes incorporaes.

Competencies mínimes

En Nueva Inglaterra los condaos funcionen principalmente como xulgaos de distritu y departamentos de policía (o inclusive, como anguaño en Connecticut, namái como distritos xudiciales), y la mayoría de l'autoridá gubernamental de nivel soestatal ta en manes de les villes y ciudaes. En dellos de los condaos menos poblaos de Maine los pequeños pueblos deleguen nel condáu les llabores policiales, y en New Hampshire munchos programes sociales son alministraos a nivel estatal. En Connecticut, Rhode Island y dalgunes fasteres de Massachusetts los condaos, anguaño, son namái denominaciones xeográfiques sin dengún poder de alministración real; la xestión de los asuntos públicos llévase namái a nivel estatal o municipal. En Connecticut, y en delles partes de Massachusetts, formáronse conseyos rexonales col envís d'enllenar parcialmente'l vacíu alministrativu que quedó tres d'abolise los gobiernos condales. L'autoridá d'estos conseyos, sicasí, ye menor que la d'un gobiernu condal: namái tienen competencies sobre infraestructures, planificación del usu de la tierra, distribución de fondos estatales y federales pa proyeutos d'infraestructura, preparación pa emerxencies y, con matices, policiales.

Competencies medies

Nel Atlánticu Mediu y el Mediu Oeste los condaos encárguense, habitualmente y como mínimo, de los xulgaos, los servicios públicos, les biblioteques, los hospitales y servicios público de salú pública, les carreteres y parques, les llabores de policía y les cárceles. Aveza a haber un rexistrador, notariu o escribanu (el títulu varía, la función non) condal, encargáu de recoyer les estadístiques de nacencies y muertes, preparar les eleiciones (delles veces en coordinación con una oficina o comisión eleutoral) y prepara y procesa los certificaos de nacencia, muerte, matrimoniu y divorciu. Encárgase, tamién, de caltener actualizáu'l rexistru de toles operaciones de compraventa rellacionaes con propiedaes inmobiliaries. Otros funcionarios importantes del condáu son el forense, el tesoreru, l'interventor, l'auditor y el fiscal del distritu.

Na mayoría los estaos el xérif del condáu ye'l máximu responsable de la seguridá pública. Sicasí, sacante en casos d'emerxencies importantes nes que ye vital qu'haiga una cadena de mandu clara, el xérif nun suel controlar los departamentos de policía de los gobiernos municipales, sinón que coopera con ellos. La interacción más habitual ente los policíes municipales y del condáu ye la entrega, pola policía, de los deteníos pa que los ayudantes del xérif los lleven a la carcel del condáu.

En munchos condaos los condaos controlen toles fasteres dientro les sos llendes que nun tean incorporaes, magar que naquellos estaos nos que los condaos sodivídense en villes (township) son estes entidaes las que les xestionen. Los residentes d'estes zones que tean descontentos coles decisiones d'asignación de recursos públicos feches pol condáu o la township pueden aconceyar y decidir votar pa incorporar el so territoriu como ciudá, villa o pueblu (city, town o village)

Unos pocos condaos apurren directamente sistemes de tresporte públicu, xeneralmente con llinies d'autobús. Por embargu, na mayoría d'ellos el tresporte públicu ye apurríu o por una axencia estatal, o por una autoridá rexonal de tresporte (que xestiona'l de dellos condaos) o por un distritu de tresporte con llendes compartíes col condáu pero con entidá xurídica estremada del gobiernu del condáu.

Competencies amplies

Nos estaos del oeste y el sur del país los condaos más poblaos ocúpense de munches infraestructures públiques como aeropuertos, palacios de congresos, museos, playes, puertos, zoolóxicos, hospitales, biblioteques llegales y vivienda pública. Apurren servicios a les families, los neños y los ancianos, servicios de salú mental y asistencia social, asistencia a los veteranos, control d'animales, supervisión de la llibertá vixilada de los presos, conservación del patrimoniu históricu, regulación alimentaria y servicios de salú ambiental. Y pueden tener otros funcionarios como abogaos d'oficiu y comisarios d'arte, derechos humanos o planificación del territoriu.

En dellos condaos hai parques de bomberos y comisaríes de policía condales, diferentes de los de les ciudaes del territoriu, los distritos especiales o los estatales. Y, por último, hai dellos estaos del sur nos que la educación pública ye organizada y alministrada polos condaos.

Estadístiques

En 2016 había nos Estaos Xuníos 3.007 condaos, 64 parishes (parroquies), 19 organized buroughs (burgos organizaos), 11 árees censales, 42 ciudaes independientes^{[nota 1]} y el distritu de Columbia, que facíen un total de 3.143 condaos y entidaes equivalentes nos 50 estaos del país y el distritu de Columbia. Había, amás, otres 100 entidaes equivalentes al condáu nos territorios de los Estaos Xuníos.El númberu mediu de condaos por estáu ye de 62, con un rangu que va de los trés de Delaware a los 254 de Texas. Los estaos del Sur y el Mediu Oeste tienden a tener más condaos que los estaos del Oeste o el Noreste, porque munchos estaos del Noreste tienen una superficie demasiáu pequeña pa poder tener munchos condaos y los del Oeste taben perpoco poblaos y cola población mui esparciada cuando foron creaos los condaos nellos. Los cinco condaos de Rhode Island, los ocho condaos de Connecticut y 8 de los 14 condaos de Massachusetts nun tienen darréu competencies de gobiernu nin estructura alministrativa de so, y continúen esistiendo namái con propósitos censales.

Los condaos y entidaes equivalentes a condaos de los Estaos Xuníos, agrupaos por estáu o territoriu

Estáu, distritu federal o territoriu	Total		Subdivisiones			Media
	Población en 2019[21]	Superficie[22]	Condaos	Entidaes equivalentes	Total	Población	Superficie
Alabama	4.903.185	131.171 km²	67	—	67	72.587	1.958 km²
Alaska[nota 2]	731.545	1.477.953 km²	—	30	30	25.582	50.964 km²
Arizona	7.278.717	294.207 km²	15	—	15	462.071	19.614 km²
Arkansas	3.017.825	134.771 km²	75	—	75	39.843	1.797 km²
California	39.512.223	403.466 km²	58	—	58	676.724	6.956 km²
Colorado	5.758.736	268.431 km²	64	—	64	86.571	4.194 km²
Connecticut	3.565.287	12.542 km²	8	—	8	447.057	1.568 km²
Delaware	973.764	5.047 km²	3	—	3	317.355	1.682 km²
Distritu de Columbia[nota 3]	705.749	158 km²	—	1	1	681.170	158 km²
Florida	21.477.737	138.887 km²	67	—	67	307.648	2.073 km²
Georgia	10.617.423	148.959 km²	159	—	159	64.845	937 km²
Ḥawai	1.415.872	16.635 km²	5	—	5	285.711	3.327 km²
Idaho	1.792.065	214.045 km²	44	—	44	38.253	4.865 km²
Illinois	12.671.821	143.793 km²	102	—	102	125.505	1.410 km²
Indiana	6.732.219	92.789 km²	92	—	92	72.098	1.009 km²
Iowa	3.155.070	144.669 km²	99	—	99	31.664	1.461 km²
Kansas	2.913.314	211.754 km²	105	—	105	27.688	2.017 km²
Kentucky	4.467.673	102.269 km²	120	—	120	36.975	852 km²
Louisiana[nota 4]	4.648.794	111.898 km²	—	64	64	73.151	1.748 km²
Maine	1.344.212	79.883 km²	16	—	16	83.217	4.993 km²
Maryland[nota 5]	6.045.680	25.142 km²	23	1	24	250.685	1.048 km²
Massachusetts	6.949.503	20.202 km²	14	—	14	486.556	1.443 km²
Michigan	9.986.857	146.435 km²	83	—	83	119.618	1.764 km²
Minnesota	5.639.632	206.232 km²	87	—	87	63.448	2.370 km²
Mississippi	2.976.149	121.531 km²	82	—	82	36.448	1.482 km²
Missouri[nota 6]	6.137.428	178.040 km²	114	1	115	52.983	1.548 km²
Montana	1.068.778	376.962 km²	56	—	56	18.616	6.731 km²
Nebraska	1.934.408	198.974 km²	93	—	93	20.507	2.140 km²
Nevada[nota 7]	3.080.156	284.332 km²	16	1	17	172.945	16.725 km²
New Hampshire	1.359.711	23.187 km²	10	—	10	133.480	2.319 km²
Nueva Jersey	8.882.190	19.047 km²	21	—	21	425.927	907 km²
Nuevu Méxicu	2.096.829	314.161 km²	33	—	33	63.061	9.520 km²
Nueva York	19.453.561	122.057 km²	62	—	62	318.472	1.969 km²
Carolina del Norte	10.488.084	125.920 km²	100	—	100	101.468	1.259 km²
Dakota del Norte	762.062	178.711 km²	53	—	53	14.301	3.372 km²
Ohio	11.689.100	105.829 km²	88	—	88	131.982	1.203 km²
Oklahoma	3.956.971	177.660 km²	77	—	77	50.955	2.307 km²
Oregón	4.217.737	248.608 km²	36	—	36	113.707	6.906 km²
Pennsylvania	12.801.989	115.883 km²	67	—	67	190.809	1.730 km²
Rhode Island	1.059.361	2.678 km²	5	—	5	211.285	536 km²
Carolina del Sur	5.148.714	77.857 km²	46	—	46	107.850	1.693 km²
Dakota del Sur	884.659	196.350 km²	66	—	66	13.113	2.975 km²
Tennessee	6.833.174	106.798 km²	95	—	95	70.013	1.124 km²
Texas	28.995.881	676.587 km²	254	—	254	109.695	2.664 km²
Utah	3.205.958	212.818 km²	29	—	29	105.214	7.339 km²
Vermont	623.989	23.871 km²	14	—	14	44.614	1.705 km²
Virxinia[nota 8]	8.535.519	102.279 km²	95	38	133	63.247	763 km²
Washington	7.614.893	172.119 km²	39	—	39	186.872	4.413 km²
Virxinia Occidental	1.787.147	62.259 km²	55	—	55	33.293	1.132 km²
Wisconsin	5.822.434	140.268 km²	72	—	72	80.260	1.948 km²
Wyoming	578.759	251.470 km²	23	—	23	25.457	10.933 km²
Estaos Xuníos (Los 50 estaos y'l distritu de Columbia)	328.239.523	9.147.592 km²	3.007	136	3.143	102.841	2.910 km²
Samoa Americana[nota 9]	51.504	199 km²	—	5	5	11.104	40 km²
Guam[nota 10]	162.742	540 km²	—	1	1	162.742	540 km²
Islles Marianes del Norte[nota 11]	52.263	464 km²	—	4	4	13.066	116 km²
Puertu Ricu[nota 12]	3.193.694	9.104 km²	—	78	78	42.784	116 km²
Islles Perifériques Menores de los Estaos Xuníos[nota 13][nota 14]	160	34 km²	—	9	9	18	4 km²
Islles Vírxenes Americanes[nota 15]	104.901	346 km²	—	3	3	34.967	115 km²
Estaos Xuníos (50 estaos, distritu de Columbia y territorios)	330.744.054	9.158.064 km²	3.007	236	3.243	100.813	2.825 km²

Población^[23]

La población media d'un condáu d'Estaos Xuníos yera de cuasi 100.000 habitantes en 2015. El más pobláu, nesi añu, yera'l condáu de Los Angeles en California: los sos 10.170.292 habitantes faen que la so población seya mayor que la de 41 de los estaos del país, siendo amás 17,4 veces mayor que la del estáu menos pobláu, Wyoming. El segundu condáu más pobláu ye'l condáu de Cook, n'Illinois, con una población de 5.238.216 habitantes. Esto ye más xente de la que vive en 28 estaos del país, y tamién que la suma de la población de los seis estaos más pequeños.

El condáu habitáu menos pobláu ye'l condáu de Kalawao, en Hawai, que tenía 89 habitantes en 2015; y la entidá equivalente a condáu menos poblada ye la islla de Swains, na Samoa americana, con 17 habitantes^[24]. Hai, amás, ocho entidaes equivalentes a condáu despoblaos: los atolones de Rose y Johnston, la municipalidá de Northern Islands, Kingman Reef y les islles de Baker, Howland, Jarvis y Navassa^[16][25][26]. Otros trés archipiélagos de les Islles Perifériques Menores tienen pequeñes poblaciones humanes non permanentes.

El condáu con mayor densidá de población ye'l condáu de Nueva York (qu'abarca'l borough de Manhattan), con 27.812 hab/km² en 2015. L'área censal Yukon-Koyukuk, n'Alaska, ye'l más estensu, y tamién el menos densamente pobláu, de los condaos y entidaes equivalentes del país; la so densidá de población yera nesi añu de 0,0147 hab/km².

Nos 50 estaos y el distritu de Columbia hai 981 condaos con más de 50.000 habitantes, 592 con más de 100.000 habitantes, 137 con más de 500.000 habitantes, 45 con más d'un millón d'habitantes y 14 con más de dos millones. Nel estremu contrariu hai 35 condaos con una población menor de 1.000 habitantes, 307 con menos de 5.000, 709 con menos de 10.000 habitantes y 1.492 con una población d'ente 10.000 y 50.000 habitantes.

Superficie

Según los datos del censu del añu 2000 la superficie media d'un condáu d'Estaos Xuníos yera de 1.610 km². Los condaos del oeste del país son xeneralmente muncho mayores que los del este: asina, por exemplu, la superficie media d'un condáu de Georgia ye de 890 km², mentantu que la d'ún d'Utah ye de 6.290 km². El condáu o entidá equivalente a condáu mayor ye l'área censal Yukon-Koyukuk, n'Alasda, con una superficie de 376.856 km². Fuera d'Alaska, aú s'asitien les nueve entidaes equivalentes más estenses, el mayor condáu ye'l de San Bernardino, en California, con una estensión de 51.947 km²; y el más pequeñu el de Kalawao, en Hawaii, con 31,058 km² de superficie. Nel territoriu continental el condáu o entidá equivalente más pequeñu ye la ciudá independiente de Falls Church, en Virxinia, que tien una superficie de 5,177 km²^[20], y s'incluyimos los territorios nel recuentu la entidá equivalente a condáu más pequeña ye Kingman Reef, un isllote de 0,03 km² d'estensión^[27].

Relaciones xeográfiques ente ciudaes y estaos

En dellos estaos una municipalidá (villa o ciudá) puede estendese namái por un condáu y nun puede anexonase territorios de los condaos adxacentes, pero na mayoría los estaos (polo menos 32) les constituciones o lleis estatales permiten que los conceyos puedan esparcer les sos llendes por dellos condaos. Dallas y Oklahoma City, por exemplu, estiéndense per tierres de cinco condaos. Nueva York ye un casu únicu, y abarca cinco condaos completos nuna única ciudá. Caún d'esos condaos comparte territoriu con ún de los cinco boroughs de la ciudá: Manhattan (New York County), El Bronx (Bronx County), Queens (Queens County), Brooklyn (Kings County) y Staten Island (Richmond County).

Referencies

1. Overview of County Government, na web de l'Asociación Nacional de Condaos (National Association of Counties).
2. County Totals Datasets: Population, Population Change and Estimated Components of Population Change: April 1, 2010 to July 1, 2012. 2012 Population Estimates. United States Census Bureau, Divison of Population, March 2013.
3. States, counties, and statistically equivalent entities, na web de la Oficina del Censu.
4. Los Angeles County, California. Datos del condáu na web de la Oficina del Censu.
5. San Bernardino County, California, na web de la Oficina del Censu.
6. Counties of American Samoa, na web statoids.com.
7. Harch C.E., The First Seventeen Years. Virginia, 1607-1624, páxs. 20, 75-6. Jamestown 350th Anniversary Historical, 1957.
8. Reynolds Jr O.M., Local Government Law (3rd ed.), p. 19. West, St Paul, 2009.
9. Counties matter, na web de l'Asociación Nacional de Condaos.
10. Broomfield's history, na web de la ciudá-condáu.
11. Petersburg Becomes 19th Borough In Alaska, na web de Alaska Public Media (3 de xineru de 2013).
12. County and equivalent entity, na web de la Oficina del Censu.
13. Cities 101-Consolidations, na web de la Lliga Nacional de Ciudaes (National League of Cities).
14. Population and Area of All Virginia Local Governments, 1790-2010. Virginia Department of Housing and Community Development, 2012.
15. 2010 FIPS Codes for Counties and County Equivalent Entities, na web de la Oficina del Censu.
16. Territories of United States Minor Outlying Islands, na web statoids.com.
17. General law local government, artículu de la Ballotpedia.
18. «NACO find a County» (inglés). National Association of Counties. Consultáu'l 29 de payares de 2014.
19. «About Connecticut» (inglés). State of Connecticut. Consultáu'l 29 de payares de 2014.
20. «County Overview». National Association of Counties. Archiváu dende l'orixinal, el 18 d'abril de 2009. Consultáu'l 3 d'agostu de 2008.
21. «Annual Estimates of the Resident Population for the United States, Regions, States, and Puerto Rico: April 1, 2010 to July 1, 2019». United States Census Bureau, Divisón de Población (30 d'avientu de 2019). Consultáu'l January 27, 2020.
22. «Table 358. Land and Water Area of States and Other Entities: 2008». Statistical Abstract of the United States: 2012. United States Census Bureau (May 1, 2008). Consultáu'l April 30, 2013.
23. County Population Totals: 2010-2019, na web de la Oficina del Censu de los Estaos Xuníos.
24. Swains Island, entrada na Enciclopedia Británica (britannica.com).
25. Municipalities of Northern Mariana Islands, na web statoids.com.
26. Districts of American Samoa, na web statoids.com.
27. Kingman Reef, entrada na Enciclopedia Británica (britannica.com).

Notes

1. Primeru del 1 de xunetu de 2016 había 42 ciudaes independientes. Esi día Bedford (Virxinia) renunció al so estatus de ciudá y convirtióse nuna villa (town) dientro'l condáu de Bedford.
2. L'estáu d'Alaska tien 19 burgos organizaos y un burgo desorganizáu (Unorganized Borough), sodividíu en 11 árees censales .
3. La Oficina del Censu de los Estaox Xuníos y la Oficina d'Alministración y Presupuestu consideren el distritu de Columbia nel so conxuntu como una entidá equivalente a un condáu.
4. L'estáu de Louisiana tien 64 parishes (parroquies) en cuenta de condaos.
5. L'estáu de Maryland tien 23 condaos y una ciudá independiente, Baltimore.
6. L'estáu de Missouri tien 114 condaos y una ciudá independiente, Saint Louis.
7. L'estáu de Nevada tien 16 condaos y una ciudá independiente, Carson City.
8. L'estáu de Virxinia tien 95 condaos y 38 ciudaes independientes.
9. Samoa Americana tien 14 condaos, pero son consideraos como entidaes llocales menores pola Oficina del Censu. Esta considera los trés distritos y dos atolones de Samoa como entidaes equivalentes a condáu.
10. Guam nun tien condaos; tol so territoriu ye consideráu una entidá equivalente a condáu pola Oficina del Censu.
11. Les Islles Marianes del Norte nun tienen condaos. La Oficina del Censu considera los sos cuatro conceyos como entidaes equivalentes a condaos.
12. Puertu Ricu nun tien condaos. La Oficina del Censu considera los sos 78 conceyos como entidaes equivalentes a condaos.
13. La Oficina del Censu considera caún de los 9 archipiélagos que formen les Islles Perifériques Menores de los Estaos Xuníos como entidá equivalente a un condáu.
14. Les Islles Perifériques Menores de los Estaos Xuníos nun tienen población permanente. Les estadístiques de población faen referencia a los sos habitantes temporales, militares o científicos.
15. Les Islles Vírxenes Americanes nun tienen condaos. La Oficina del Censu considera a caúna de les trés islles principales (Saint Croix, Saint Thomas y Saint John) como una entidá equivalente a un condáu.

Enllaces esternos

• Manual de referencia d'árees xeográfiques (Oficina del Censu de los Estaos Xuníos).
• Asociación Nacional de Condaos.
• Remisión a cualquier estáu, condáu, ciudá, códigu ZIP nos EE. XX..
• Mapes de formación de los condaos de EE. XX. 1643-Presente Gráfica animada acumulativa.

• Datos: Q47168
• Multimedia: Counties of the United States