Candidatura de Londres a los Xuegos Olímpicos de 2012
From Wikipedia, the free encyclopedia
Londres 2012 foi la candidatura a la que se-y concedieron los Xuegos Olímpicos de 2012, que van ser celebraos en Londres, onde la mayor parte de los acontecimientos van tener llugar en Stratford, Newham. L'Asociación Olímpica Británica tuviera diseñando la candidatura dende 1997. N'avientu de 2000 presentóse l'informe definitivu a los miembros del gobiernu.
Dempués de que'l Reinu Xuníu presentara otros trés candidatures fallíes (Birmingham en 1992 y Mánchester en 1996 y 2000), decidió presentase a Londres como candidata, yá que yera la única ciudá británica que tenía posibilidaes de ser escoyida pol Comité Olímpicu Internacional (COI), yá que tamién diben competir nel procesu ciudaes de gran escala internacional.[1] El 6 de xunetu de 2005 el COI concedió nel so 117º Sesión, celebrada en Singapur, a la candidatura de Londres el derechu d'allugar los Xuegos de la XXX Olimpiada. La ciudá venció a la que foi la gran favorita (París 2012) na cuarta y última votación cola resultancia de 54 votos a favor de Londres y 50 a favor de París y convirtióse d'esta miente na primer ciudá qu'allugara los Xuegos Olímpicos tres veces.[2]
Na dómina de la candidatura, la proyeición del presupuestu taba afitada n'alredor de 2 mil millones de llibres, pero más apocayá, embaráxase que'l costu final va tar alredor de 9 mil millones de llibres y que va implicar una rexeneración del área londinense de Stratford, según meyores nos servicios de les zones d'alredor.[3][1] El tresporte públicu, unu de los aspeutos que peor calificación llogró de la candidatura, va sufrir numberoses meyores, incluyendo'l Metro de Londres y la nueva danzadera d'alta velocidá Olympic Javelin.[4]
Les celebraciones llevaes a cabu'l día dempués de l'axudicación de los Xuegos quedaron avafaes y esllucíes polos ataques terroristes. El 7 de xunetu de 2005 les esplosiones de Londres estrozaron el sistema de tresporte públicu y mataron a 52 persones, causando daños a cientos de persones más. Nun esiste nenguna prueba que rellacione la eleición del COI col ataque terrorista.[5]
Dempués del ésitu de la candidatura, el Comité d'Organización de Londres pa los Xuegos Olímpicos foi establecíu pa supervisar el desenvolvimientu de los acontecimientos hasta que rematen los XX.OO. de 2012. Hubo dellos cambeos dempués de que la candidatura fora escoyida, incluyendo la decisión del COI d'esaniciar dellos acontecimientos deportivos y camudar l'allugamientu de la Zona Olímpica, siendo dambos cambeos menores en cuanto al conxuntu de les infraestructures de los Xuegos Olímpicos de Branu de 2012.[6]