ديموقراطيه
From Wikipedia, the free encyclopedia
الديموقراطيه ( يونانى: δημοκρατία ، انجليزى: Democracy )، مفهوم سياسى قديم بدا ايام المدينه-الدوله فى اتينا القديمه. وكان ده فى القرن الخامس قبل الميلاد ، و الكلمه دى بتتكون من كلمتين يونانيين وهما: " ديموس δῆμος " و " كراتوس κράτος ". كلمة ديموس معناها الشعب ، وكلمة كراتوس معناها سلطه ، فيبقى معنى كلمة ديموقراطيه : سلطة الشعب و بكده هى عكس استبداد فرد او جماعه معينه دينيه او عرقيه او غيرها بالسلطه.
النظام الديموقراطى بمفهومه الغربى بيعتمد بشكل كبير على اللى كان موجود فى اتينا القديمه فى اليونان اللى كان النظام الديموقراطى فيها بيتشكل من حاجتين مختلفين عن بعض ، الاولانيه : عباره عن مجلس بيتكون من حوالى 500 عضو بياخدوا الافكار التشريعيه اللى المواطنين بيقدموها وبعدين يجهزوها على شكل مشروعات قوانين. و التانيه: عباره عن جمعيه من المواطنين ، وده كان نوع من الديموقراطيه المباشره. وكان المواطنين الاتينيين LES CITOYENS ليهم الحق فى الكلمه و التصويت قدام الجمعيه دى اللى كان اسمها اكليزيا ECCLESIA.
مع الوقت ، اتطورت الديموقراطيه وظهرت بشكلها الموجود دلوقتى فى اواخر القرن التمنتاشر و بدايات القرن التسعتاشر.
بطبيعة الحال النظام الديمقراطى مضاد للنظام الديكتاتورى القايم على حكم استبدادى بيقوم بيه فرد او جماعه زى ما كان فى نظام النازى فى المانيا و فى النظام الناصرى فى مصر و النظم الدينيه فى العصور الوسطى و العصر الحديث.