![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/a1/Description_de_l%25C2%25B4Egypte_5.jpg/640px-Description_de_l%25C2%25B4Egypte_5.jpg&w=640&q=50)
تاريخ مصر الخرافى
From Wikipedia, the free encyclopedia
تاريخ مصر الخرافى - Imaginary History of Egypt - ، هو تاريخ مصر اللى كان معروف قبل فك شامبوليون للهيروغليفيه المصريه و إهتمام الأوروبيين بإكتشاف تاريخ مصر الحقيقى Real history of Egypt عن طريق الابحاث العلميه و الإكتشافات الاثريه. تاريخ مصر الخرافى ده موجود فى كتب القرون الوسطى و ساعات لغاية دلوقتى فى عقول غير المثقفين.
![Thumb image](http://upload.wikimedia.org/wikipedia/commons/thumb/a/a1/Description_de_l%C2%B4Egypte_5.jpg/320px-Description_de_l%C2%B4Egypte_5.jpg)
قبل شامبوليون (1790 - 1832) كات الهيروغليفيه المصريه نفسها بتتفسر غلط، و كان السايد إن الرسومات الهيروغليفيه دى مش حروف لكن رسومات بترمز لحاجات. و من المنطلق الغلط ده اترجمت الرسومات و اتفسرت بطريقه خرافيه و ظهرت نظريات لجهال ومنجمين وسحره ورجال دين من الشرق والغرب.
قبل الإكتشافات و الابحاث العلميه اللى فتح بابها شامبوليون كان المعروف من تاريخ مصر اللى اتذكر فى الكتب الدينيه و قصة فرعون و موسى و يوسف إتضافت ليها قصص و تفسيرات خرافيه. ده مع انه كانت فيه كتب لرحاله و مؤرخين يونانيين و رومان ( زى مثلا هيرودوتوس و ديودورس الصقلى و استرابون و بلوتارك و غيرهم ) زاروا مصر و كتبوا عنها و عن تاريخها و ديانتها بطريقه موضوعيه. وده السبب أن الأوروبيين كانوا بيعرفوا عن تاريخ مصر أكتر بكتير من المصريين فى عصور ما بعد الفرعونيه، اللى من كتابتهم واضح انهم فى الغالب ما كانوش بيطلعوا على الكتب دى. و دى ملحوظه أشار ليها المستشرق فان هومر فى كتابه عن تاريخ الدوله العثمانيه بقوله " إن أغلب الأتراك و الفرس و العرب ما بيشوفوش ( عجايب مصر ) زى ما بيشوفوها الأوربيين و قدماء اليونانيين و الرومان " و بيقول ان فى الوقت اللى الأوربيين بيعتبروا مصر المنبع الاول للعلوم و الفنون و مهد للهندسه و البنا و الزراعه و الكتابه و الملاحه و بيحترموها و بيحترموا عقائدها و بيعجبوا بأثارها و معابدها و اهرامها و مسلاتها و تماثيلها، بنلاقى الشرق ما بيشوفش فى المعابد و التماثيل و ابو الهول إلا مخابئ سحريه لكنوز مدفونه بتحرسها التماثيل و الصور. و ما بيلاقوش فى الهيروغليفيه الا طلاسم بتخفى عن الناس طرق استخراج الدهب. و كمل : إنهم ( الشرقيين ) ما بيعرفوش من الفراعنه إلا فرعون يوسف و فرعون موسى اللى بلعه البحر. طبعاً هو بيتكلم عن فتره كان فيها العلم منعدم او شبه منعدم فى الشرق و كان لسه ما ظهرش فى مصر ناس بيهتموا بأثارات و تاريخ بلدهم. المفكر المصرى سلامه موسى (1887 - 1958) بيحكى إنه لما راح أوروبا سنة 1908 لفت نظره إهتمام الأوربيين بتاريخ و اثار مصر و بيسألوه عنها بصفته مصرى فأول ما رجع مصر سافر على الصعيد عشان يتعرف على تاريخ مصر و أثارها اللى الأوروبيين مهتمين بيهم و المصريين مش دريانين بيهم.