طاعون

الطاعون هوه مرض معدى بتسببه باكتيريا اسمها يرسينيا بيستيس (Yersinia pestis) ، المرض دا بيتنقل للانسان عن طريق القوارض (زى الفيران و السناجب) لما بيتقرص من البراغيت المصابه بالمرض.

طاعون
معلومات عامه
اختصاص طبى	امراض معديه
من انواع	مرض معدى ،  ومرض
الاسباب
الاسباب	يرسينيا طاعونيه [1][2][3]
طريقة انتقال العامل المسبب للمرض	انتقال عن طريق الجو [4]
بيسبب	الموت الاسود طاعون جستنيان
المظهر السريرى
الاعراض	حمى [3]،  وصداع [3]،  وترجيع ،  ووجع عضلى ،  وكحه ،  وهذيان
الاداره
حالات مشابهه	طاعون دبلى ،  والموت الاسود
تعديل

وبا الطاعون انتشر فى العالم من حوالى سنه 1347

تاريخ

الطاعون كان واحد من اخطر الامراض اللى سببت كوارث و اوبئه و ابادت جيوش كامله فى العصور القديمه و عشان كده اشتهر وباء الطاعون اللى ضرب اوروبا فى القرن الاربعتاشر باسم الموت الاسود لانه اتسبب فى قتل تلت سكان اوروبا فى الوقت دا. اياميها فى مصر الناس كانت بتسميه " الكُبه ".

فى نهاية القرن التسعتاشر و بداية القرن العشرين ابتدت تظهر موجات من وبا الطاعون فى بلاد اسيا و شويه شويه انتشرت فى العالم كله و اتسببت فى موت الملايين من البشر.انهارده و بفضل الاجراءات الصحيه الشديده و بفضل المضادات الحيويه الحديثه ما بقاش الطاعون يصيب اعداد كبيره من الناس و لحد اللى ممكن يجيلهم طاعون ما بقوش يموتو زى زمان لان نسبة الشفا منه مع العلاج ممكن توصل ل90 % من الحالات.

رغم دا كله، الطاعون ما اتقضاش عليه بشكل نهائى و لسه لحد دلوقتى ممكن يتنقل للناس و خصوصا اللى عايشين فى مناطق فيها اعداد كبيره من الفيران و البراغيت.

طبيعة المرض

الطاعون مرض بييجى للقوارض بشكل اساسى و بيدخل الانسان فى دورة حياته بالصدفه.الطاعون اذا انتشر بين القوارض دى بمعدلات عاليه ،بيتسبب فى موت اعداد كبيره منها و بالتالى البراغيت اللى كانت عايشه عليها بتلجأ للانسان عشان تتغذى على دمه و بكدا بيبتدى انتقال العدوى من الفار الميت مثلا للبشر. الباكتيريا اللى بتسبب الطاعون عندها قدره عاليه على التكاثر بسرعه فى انسجة الحيوان او الانسان المصاب.اول ما بتصيب الباكتيريا دى البرغوت بتبتدى تتكاثر بعنف جوه الجهاز الهضمى بتاعه و لما البرغوت دا بيقرص فار او انسان سليم ، بيحقن جوه جسمه اللعاب بتاعه التلوث بالباكتيريا اللى بتتجه على الاوعيه الليمفاويه و بتروح على الغدد الليمفاويه و بتسبب تضخم فيها و الم شديد و فى النهايه بتدمر الانسجه بتاعة الغدد الليمفاويه و ممكن كمان تتكاثر فى الطحال و الكبد و نخاع العضم بتوع المصاب.

لينكات برانيه

مصادر

1. مُعرِّف أنطولوجيا الأمراض: http://www.disease-ontology.org/?id=DOID:3482
2. العمل الكامل مُتاحٌ في: http://purl.obolibrary.org/obo/doid.owl — الرخصة: CC0
3. https://www.cdc.gov.tw/Category/Page/iCortfmEfVKqcZMeDdEuDA — تاريخ الاطلاع: 25 ابريل 2020
4. مُعرِّف أنطولوجيا الأمراض: http://www.disease-ontology.org/?id=DOID:3482 — تاريخ الاطلاع: 15 مايو 2019 — الرخصة: CC0