الحرب البولانديه السوفييتيه

الحرب البولانديه السوفييتيه هى حرب استمرت ما بين فبراير 1919 لحد مارس 1921 و شاركت فيها روسيا السوفييتيه و اوكرانيا السوفييتيه من ناحيه ضد الجمهوريه البولانديه التانيه و جمهورية اوكرانيا الشعبيه ، اربع دول اتأسسو مع نهاية الحرب العالميه الاولانيه.هدف روسيا و بولاندا من دخول الحرب كان السيطره على اوكرانيا و خلصت الحرب بترسيم الحدود بين البلدين اللى استمرت لحد سنة 1939.

قوات الدفاع البولانديه سنة 1920

الحرب

كانت فى مناوشات بين روسيا و بولاندا على خفيف طول سنة 1919 بس الحرب الحقيقيه ابتدت لما اعلن الزعيم البولاندى يوسف بيلسودسكى عن تحالف بينه و بين الزعيم الوطنى الاوكرانى سيمون بيتليورا يوم 21 ابريل سنة 1920.قوات الزعيمين ابتدت تغزو اوكرانيا و وصلت لحد العاصمه كييف و سيطرت عليها يوم 7 مايو. فى يونيه ابتدا الجيش الاحمر السوفييتى يعمل هجوم مضاد و وصل لحد الحدود البولانديه فى يوليه من نفس السنه.بدافع من الحماس الثورى ، كمل الجيش الاحمر تقدمه جوه اراضى بولاندا نفسها لحد ما وصل لحدود وارسو (فى اوائل شهر اغسطس).

تدخل الغرب

القوى الامبيرياليه فى اوروبا الغربيه خافو من نجاح السوفييت فى تشكيل حكومه شيوعيه فى بولاندا و منها ممكن يوصلو لالمانيا فبعتو حمله عسكريه بقيادة الجينيرال الفرنساوى ماسكيم فيجان عشان يدى نصايح للجيش البولاندى.البولانديين عملم هجود مضاد فى نص اغسطس و كرشو الروس بره اراضيهم.

نتايج الحرب

فى اكتوبر 1920 عمل الروس و البولانديين وقف اطلاق للنار و وقعو معاهدة ريجا يوم 18 مارس سنة 1921 و اللى نصت على ان اغلب اراضى اوكرانيا تتنيها ضمن الجمهوريه السوفييتيه و فى نفس الوقت ادت بولاندا حتت كتير من اراضى بيلاروس و اوكرانيا.

مصادر

• "Russo-Polish War." Encyclopædia Britannica. Deluxe Edition. Chicago: Encyclopædia Britannica, 2008.

فيه فايلات فى تصانيف ويكيميديا كومونز عن:

الحرب البولانديه السوفييتيه