![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/2/21/Hulagu_1.jpg/640px-Hulagu_1.jpg&w=640&q=50)
غزو سوريا (1259)
From Wikipedia, the free encyclopedia
غزو سوريا سنة 1259 هو غزو المغول لسوريا بقيادة هولاكو سنة 1259 - 1260م. بعد ما استولى المغول على بغداد سنة 1258 راحت جيوشهم على سوريا و استولت على مدنها.
![Thumb image](http://upload.wikimedia.org/wikipedia/commons/thumb/2/21/Hulagu_1.jpg/320px-Hulagu_1.jpg)
فى سنة 1258 استولى هولاكو على بغداد و قضى على الخلافه العباسيه ، و فى سنة 1259 راح على ماردين و بعدين حاصر ميافارقين . الناصر يوسف حاكم دمشق بعت ابنه الملك العزيز لهولاكو بهدايا عشان يرضيه و يستعطفه و يساعده فى الاستيلاء على مصر ، لكن هولاكو رد عليه بجواب جه فيه : " إذا وقفت على كتابى هذا فسارع برجالك وأموالك وفرسانك الى طاعة سلطان الارض شاهنشاه روى زمين، تامن شره وتنل خيره... ولا تعوق رسلنا عندك كما عوقت رسلنا من قبل، فإمساك بمعروف او تسريح بإحسان، وقد بلغنا أن تجار الشام وغيرهم انهزموا بأموالهم وحريمهم الى مصر، فإن كانوا فى الجبال نسفناها، وإن كانوا فى الارض خسفناها ".
لما قرا الناصر يوسف الكلام ده اتفزع و بعت حريمه على الكرك عند الملك المغيث عمر ولما عرف السوريين فى دمشق الأخبار صابهم الرعب و ابتدوا يهربوا على مصر و كان الوقت شتا و الجو برد فمات منهم ناس كتيره فى السكه و أكترهم نهبهم قطاعين الطرق. و لما عرف الناصر يوسف إن المغول حا يهجموا على سوريا طوالى بعت كمال الدين بن العديم على مصر بجواب يستنجد فيه بجيشها.
طلع هولاكو من بغداد و راح على ديار بكر و منها على آمد فى طريقه لحلب. و فى السكه حاصر حران بالمجانيق و استولى عليها ، و عدت عساكر من جيشه نهر الفرات و نهبوا القرى. لما عرف اهل حلب إن الجيش المغولى جى عليهم قرروا انهم يسيبوها فهربت أعداد منهم. فضل المغول يقربوا من حلب و دخلوا فى معارك مع العساكر السوريين اللى خرجوا يحاربوهم و قتل المغول منهم اعداد كبيره. مع تقدم الجيش المغولى زاد فزع الناصر يوسف و قرر انه يقابل هولاكو بنفسه و راح قعد فى " برزه " ، و فى نفس الوقت بعت جواب للملك المغيث فى الكرك و لقطز سلطان مصر يستنجد بيهم.
الامرا بقوا مرعوبين لكن الامير زين الدين الحافظى وزير الناصر يوسف فضل يعظم و يمجد فى هولاكو واقترح على الناصر يوسف ان احسن حاجه انه يهادنه و يدخل فى طاعته. لكن فى الغضون دى استولى هولاكو على قلعة حران و نواحى حران و مابقاش قدامه غير انه يروح على حلب فلما سمع الناصر يوسف الأخبار دى بعت مراته و ابنه و فلوسه على مصر و هربت وياهم ستات الامرا و اعداد كبيره من الناس وفضل الناصر يوسف فى دمشق مع طايفه من الامرا لغاية ما سمع ان هولاكو استولى على البيره و أخد قلعتها فإبتدوا السوريين فى دمشق و غيرها يبيعوا فى حاجتهم بأبخس الأتمان و يهربوا و ماتت منهم اعداد ضخمه فى السكه لمصر من شدة برد الشتا.