Dr Staat Palestina wird internazionaal vo de mäiste Staate as staatligi Äihäit anerkennt, aber d Staatligkäit isch völkerrächtlig umstritte. Er isch am 15. Novämber 1988 z Algier vo dr Palestinensische Befreijigsorganisazioon (PLO) as Staat vo de Palestinenser usgrüeft. D Gründer häi s Westjordanland und dr Gasasträife, wo vo Israel sit 1967 bsetzt si, in Aaspruch gnoo mit Ostjerusalem as d Hauptstadt vom Staat. Zur Zit vo dr Unabhängikäitserkläärig het sich d PLO im tunesische Exiil befunde und kä Kontrolle über die beaaspruchte Gebiet gha. Doorum het dä Schritt zerst nume sümboolischi Bedütig gha. Bis 1990 häi äinewääg fast 100 Staate e Staat Palestina anerkennt, u. a. die Dütschi Demokratischi Republik (DDR). Hüt anerkenne en 138 Staate. D Bundesrepublik Dütschland anerkennt Palestina nit as Staat, het aber diplomatischi Beziejige zu de Verdräter vo de Palestinensische Autonomiigebiet.