Dr Orinoco füert 35'000 m³/s Wasser und isch us dere Sicht dr viertgrössti Fluss uf dr Wält und dr zwäitgrössti in Südamerika. In dr Lengi isch dr Orinoco dört as Fluss mit sine 2'010 km und as Flusssüsteem mit ere Lengi vo öbbe 3'010 km nume dr viertlengsti noch em. Dass er doch so vil Wasser füert, chunnt vo de hooche Niiderschleeg fast im ganze Iizugsgebiet, wo öbbe e Millioon Quadratkilometer umfasst. S Flussgebiet lit nume e bitz nördlig vom Ekwator, zringsum si im Weste d Ande und anderi Gebirg und es isch vo tropische Räägewald und Füechtsawanne bedeckt. Öbbe zwäi Driddel von em ligge uf venezolanischem Staatsgebiet und äi Driddel uf däm vo Kolumbie.