Dr Mathisliweier isch e fascht 2 ha große Moossee im Schwarzwald. Är lyt im Hochschwarzwald zwisch em Fälberg im Weschte un em Ditisee im Oschte uf em Baan vu dr Gmai Hinterzarte uf rund 999 m ü. NN sidweschtli vum Hauptort im Naturschutzbiet Eschegrundmoos. Dr Weier wird vu Weschtsidwescht no Oschtnordoscht vum Zartebach durflosse. Dä Bach het sy Ursprung am Oschthang vu dr Ramsilihechi uf rund 1.055 m ü. NN un nimmt vu rächts us em gschitzte Moos dr Eschegrundmoosbach uf. Bis zum see het er e Lengi vu villicht aim Kiliometer. E chirzere Bach chunnt vu Norde här us em Stuckwald in dr See.