Dr Walter Courvoisier ischt am 7. Februar 1875 z Riehen uf d Welt komma. Sei Vaddr isch dr berihmde Chirurg Ludwig Georg Courvoisier gwäa. Nôch-em Abi isch dr Walter Courvoisier en d Fuaßstapfa vo seim Vaddr tredda ond hôt au Medizin studiirt. Obwohl’r em Jôhr 1900 sogar promoviirt hôt (Dr. med.), isch’r en seim Beruaf et glicklich wôrra, weil sei Kopf emmr voll vo laudr Musik gwäa ischt. Drom hôt’r em Altr vo 27 Jôhr sei Stell als Assischdenzarzt uffgäa, ischt nôch Mincha ganga ond hôt deet beim Ludwig Thuille Privatstonda en Musiktheorii ond Kombosizioo gnomma. Dô drbei hôt’r d Dochtr vo seim Lehrer kennaglernt ond a Aug uff-se gwôrfa. S hôt et lang dauret, ond’r ischt em Thuille sei Schwiigrsoh wôrra. Dr nägscht Karriereschridd hôt-em da Poschda als Vizedirigent beim Minchner Kaim-Orchester (em Vorgenger vo de Minchner Philharmoniker) beschert. Bald druff hôt dr Courvoisier an Lehruftrag firs Fach Musiktheorie bei dr Minchner Akademie der Tonkunst (seit 1998 hoißt dui Hochschule für Musik und Theater München) kriagt. 1919 isch’r deet zom Professr ernannt wôrra ond hôt vo dô ôô Kombosizioo glehrt. Zo seine Schialer hend ondr andrem selle schbätre Schweizer Kombonischda Willy Burkhard, Hans Haug ond Heinrich Sutermeister sowia dr Stuegerter Hermann Reutter gheert.
Em Courvoisier sei Kombosizioo-Stil stôht nôh beim Impressionismus, zeigt abr emmr môl wiidr au schbätromandische Ôôkleng.
Werk firs Theater
Lanzelot und Elaine, a Musikdrama en viir Ufziig nôch-ma Libreddo vo dr Berta Thiersch, zom erschda Môl ufgfihrt 1917 en Mincha
Die Krähen, a musikalischa Komeede en oim Akt nôch-ma Libreddo vom Alois Wohlmuth (UA 1921 z Mincha)
Der Sünde Zauberei, a Opr e-ma Vorschbiil ond zwoi Bilder nôch-ma Tekscht vom Joseph von Eichendorff, wo wiidrom uff-na Vorlag vom Pedro Calderón de la Barca zruckgôht (1929)
Werk fir Solischda ond Cheer
Die Muse fir Bariton ond Orkeschtr nôch-ma Tekscht vom Heinrich Leuthold (1903)
Gruppe aus dem Tartarus, a Ballade fir an gmischda Chor ond Orkeschtr nôch-ma Tekscht vom Friedrich Schiller (1904)
Der Dinurstrom, nomôl a Ballade fir an gmischda Chor ond Orkeschtr, desmôl nôch-ma Tekscht vom Wilhelm Hertz (1906)
Das Schlachtschiff Téméraire (1796), a Ballade fir an Mennerchor ond Orkeschtr nôch-ma Tekscht vom Detlev von Liliencron (1906)
Auferstehung, a Kantade fir viir Solostemma, an gmischda Chor ond Orkeschtr nôch-ma Tekscht us dr Bibl, bearbeitet vom Alfred Bertholet (1915, dômôls hôt des Werk noh Totenfeier ghoißa.)
Drei Cheer a cappella nôch Gedicht vom Joseph von Eichendorff (1931)
Fenf Gseng fir an gmischda Chor a cappella (1931)
Werk fir oinzlne Sengstemma mit-ra Klaviirbegleidong
.jpg)
