From Wikipedia, the free encyclopedia
D Victoria (dytsch au Viktoria, aigetli Alexandrina Victoria; * 24. Mai 1819 im Kensington Palace, London; † 22. Jänner 1901 z Osborne House, Isle of Wight) isch vu 1837 bis 1901 Chenigi vum Verainigte Chenigrych vu dr Großbritannien un Irland gsi un het ab 1876 as erschte britische Monarch un zwaite Mänsch iberhaupt dr Titel „Chaiser vu Indie“ drait.
Si isch d Dochter vum Edward Augustus, Duke of Kent and Strathearn un dr Victoire von Sachsen-Coburg-Saalfeld gsii un isch d Ururgroßmueter vu dr jetzige britisch Chenigi Elisabeth II. un au vu däre ihrem Brinzgmahl Philip.
Wu d Victoria uf dr Droon gstigen isch, het d Personalunion zwische Großbritannien un Hannover ufghert, wel im Chenigrych s salisch Gsetz gulte het, wu Fraue vu dr Droonfolg uusgschlosse het. Mit em Dood vu dr Victoria isch d Herrschaft vum Huus Hannover uf em britische Droon z Änd gange, mit ihrem Suhn Chenig Eduard VII. het d Herrschaft vum Huus Sachse-Coburg un Gotha aagfange.
As konschtitutionälli Monarchi isch si pro forma Herrscheri iber meh wie ne Fimftel vu dr Ärd un e Drittel vu dr Wältbevelkerig gsii. In ihre Regierigszyt hän d Ober- un Mittelschichte vu Großbritannie ne byschpellose wirtschaftlige Bluescht erläbt, un s Britisch Wältrych isch uf em Hegschtpunkt vu syre Macht gstande. Wichtig fir ihri Regieriszyt sin dr Yyfluss vu ihrem Kusäng un Mann Prinz Albert vu Sachse-Coburg un Gotha un ihre fascht vellige Ruckzug us dr Effetligkait no däm sym Dood anne 1861. D Victoria het 63 Jahre un 7 Monet regiert, lenger wie ne jede andere britische Monarch vor ihre. Dur ihri zahlryche Noochuu het si au dr Byname „Großmueter vu Europa“ iberchuu. Ihri lang Regäntschaft het em Viktorianische Zytalter dr Name gee.
D Victoria un dr Albert hän nyyn Chinder ghaa:
Seamless Wikipedia browsing. On steroids.
