Varroamilbe

D Varroamilbe (latynisch: Varroa destructor) isch es Spinnedier vo dr Familie vo de Varroidae, wo als Parasit bi de Imbi läpt.

Si isch öppe 1,1 Millimeter lang und 1,6 Millimeter breit. Ires ganze Läbe lang isch si i de Imbistöck oder uf de Hunggimbi sälber. D Imker luege se näbe de starche Insektegift als die zwöiti Ursach für d Schääde vo irne Völker a.

Dr Name vo däm Dier chunt vom Römer Marcus Terentius Varro, won es Buech über d Landwirtschaft gschribe het.

e Varroamilbe auf eme Imbi

D Wiibli vo dr Varroamilbe läbe uf de Imbi und legge iri Eier i d Chammere, wo d Imbi drinn d Bruet lönd lo gross wärde. Us de Eier entwicklet sech zerscht e Larfe und denn e Nymphe, wo zletscht e usgwachseni Milbe wird.

Bim Wachse frässe d Dier dr Saft vo dr Imbibruet. Das macht, ass d Imbi weniger gsund sind und nid gnueg zum Überläbe vom Volch byträge. D Milbe verbreite au anderi Chrankete. Und drum goots, wenn ime Imbistock d Varroamilbe achunt, nume öppe drüü oder vier Joor bis s ganze Imbivolch z Grund goot. S Uufträtte vo de Milbe heisst bi de Fachlüüt d Varroose, si gilt als schlimmi Diersüüch. Wil me so vil Völcher verlüürt, redt me vom Imbistärbe.

D Varroamilbe het früener nume z Oschtasie gläpt, und zwar als Parasit vom Öschtleche Hunggimbi. Uf Europa isch si als Neozoe erscht im 20. Joorhundert mit em Handle vo Imbivölcher und Königinne cho. Es erschts Mol het me se schynts anne 1967 z Bulgarie gfunde.

Literatur

• Gerhard Liebig: Einfach imkern. Leitfaden zum Bienen halten. 2. Auflage. Tübinger Chronik, Aichtal 2002, ISBN 3-9803568-6-8.

Weblink

 Commons: Varroamilbe – Sammlig vo Multimediadateie

• Agroscope: Varroa