From Wikipedia, the free encyclopedia
D Terroraaschleg vu Paris sin e Serie vu Attentat un Gaiselnahme am Oobe vum 13. Novämber 2015 an verschidene Ort in dr franzesische Hauptstadt gsii, wu 130 Persone umbrocht[1] un 352 verletzt wore sin, 97 dodervu schwär.
Di maischte Opfer het s gee im Bataclan (11. Arrondissement), wu an däm Oobe di US-amerikanisch Rockband „Eagles of Death Metal“ e Kunzärt vor rund 1500 Bsuecher gee het. Vier Manne sin mit Kalaschnikow in s Theater yydrunge un hän aagfange in d Lyt z schieße. Derno hän d Attetäter Gaisle gnuu. D Bolizei het speter s Gebei gstirmt. Bi dr Schießereie sin zmindescht 100 Mänsche verschosse wore.
In dr Nechi vum Stade de France, wu e Frynschaftsspiil zwische dr franzesische un dr dytsche Fueßballnationalmannschaft stattgfunde het, het s baar Explosione dur Sälbschtmordattetäter gee.
Wyteri Aaschleeg het s gee uf mehreri Café, Bar un Restaurant. Im Restaurant „Le Petit Cambodge“ im 10. Arrondissement un im Café „Le Carillon“ vis-à-vis zmindescht 15 Mänsche, im Café „La Belle Équipe“ zmindescht 19. Schießereie het s au gee am Boulevard Beaumarchais, am Boulevard Voltaire, an dr Avenue de la République un an eme McDonald's bim Place de la République[2].
Dr franzesisch Bresidänt François Hollande het dr Notstand im ganze Land uusgruefe, d Bewohner vu Paris sin ufgruefe wore, nit uf d Stroß z goh. Er het au erchlärt, dass es sich bi de Täter vermuetlich um Aahänger vu de Terrororganisation Islamische Staat handlet.
Bolitiker us aller Wält hän ihre Entsetze un Druur uusdruckt un Frankrych Unterstitzig zuegsait[3].