Schadschar ad-Dur

D Schadschar ad-Dur, شجر الدر, was uf Arabisch "Perlechettene" bedütet, (offizielle Name al-Malikah Ismat ad-Din Umm-Chalil Schadschar ad-Dur, Arabisch: الملكة عصمة الدين أم خليل شجر الدر, Übername: Umm Chalil, gstorbe 1257 z Kairo) isch d Witwe vom ayyubidische Sultan as-Salih Ayyub gsi. Si het im Sibte Chrüzzug (1249-1250) gege Ägypte e wichdigi Rolle gspiilt. Die muslimische Historiker und d Chroniste us dr Mamelukeziit hai dänggt, ass si vo türkischer Abstammig siig.

Schadschar ad-Dur
Sultan vo Ägypte
Regierigsziit	1250–1257 noch dr Ziitwändi
Name	al-Malikah Ismat ad-Din Umm-Chalil Schadschar ad-Dur
Gstorbe	1257 noch dr Ziitwändi
Dodesort	Kairo
Begrabe	Kairo
Vorgänger	Turan Schah
Nochfolger	al-Mansur Ali
Verhürotet mit	Is al-Din Aybak

Regierig

D Schadschar ad-Dur isch noch dr Ermordig vom Turan Schah, wo s Ändi vo de Ayyubide bedütet het, am 2. Mai 1250 d Sultanin vo Ägypte worde. Si isch under em Iifluss vom Is al-Din Aybak, em Atabeg, d. h. dr Afüehrer vo dr mamelukische Armee, gstande und het dä ghürotet, wil si as Frau in dr islamische Wält nit hät chönne regiere. Si hät aber lieber elei regiert, het zerst brobiert ihn z entmachte und het en schliesslig lo umbringe. D Mameluke hai se festgnoh, und d Ahänger vom Aybak, d Muisiyya Mameluke, hai se welle döte, aber d Salihiyya Mameluke hai se in Schutz gnoh. Nochdäm im Aybak si Sohn, dr al-Mansur Ali, Sultan worden isch, isch d Schadschar ad-Dur vo Sklavefraue z Dod gschlage worde.

Grab

D Schadschar ad-Dur isch in dr Nöchi vo dr Moschee vo Tulun begrabe worde. Ihr Grab zelt zum Schönste in dr islamische Grabarchidektur. Inne het s e Michrab, e Gebätsnische, wo vo Künstler us Konstantinopel mit eme Läbensbaummosaik dekoriert worden isch. Es git au e sehr schöni kufischi Holzinschrift, wo inne rings ums Grab lauft.

Dä Artikel basiert uff ere fräie Übersetzig vum Artikel „Shajar_al-Durr“ vu de änglische Wikipedia. E Liste vu de Autore un Versione isch do z finde.