Schwiizer Romanischtin From Wikipedia, the free encyclopedia
D Sara Cotelli isch e Schwiizer Sproochwüsseschaftlerin und Dialäktoloogin.
Si isch in ere Familie vom Kanton Nöieburg ufgwachse, iire Vatter isch en Iteliäner gsi, wo fasch sis ganze Lääbe scho z Nöieburg gsi isch. Es Joor lang isch d Sara Cotelli uf Ängland. Derno het si a dr Uni Nöieburg Französisch und Änglisch und Sproochwüsseschaft studiert. Für en «Erasmus»-Studiezyt isch si nomol uf Ängland gange. Im Joor 2003 het si s Lizänziat gmacht und 2004 a dr Uni York z Toronto der Master of Arts. 2008 het si s Lehrerdiplom vo der Uni Fryburg überchoo.
Im Joor 2015 het si, wider a der Uni Nöieburg, mit der Arbet Question jurassienne et idéologies langagières. Langue et construction identitaire dans les revendications autonomistes des minorités francophones (1959-1978) bim Nöieburger Profässer Andres Kristol und bi der Marinette Matthey vo der Uni Grenoble s Dokterexaame gmacht. Für die Arbet isch si im ene Nazionalfonds-Projäkt em Zämehang zwüsche der Jurafroog und der sproochlichen Ideology noche gange; si het undersuecht, wie i der Gschicht vom Jura bi de jurassische Separatischte die wälschi Sprooch es Kampfmittel gäge s dütschsproochige Bäärn gsi isch. Si seit, me heig bi der Sproochforschig no chuum druuf gluegt, wie im Fall vom Jura no öppis meh am vilglobte sproochliche Zämehalt vo der Schwiiz verbrochen isch.
Scho anne 2004 het d Cotelli als Assischtäntin bim Institut für d Sproochwüsseschaft und d Komunikazioon a der Uni Nöieburg agfange. Vo 2004 bis 2009 isch si bim Wörterbuechprojäkt Base de données lexicographiques panfrancophone derby gsi. Sid 2009 lehrt si a der Uni Nöieburg Französisch, und e Zyt lang isch si au Dozäntin für Französisch am Sproochezäntrum vo der Uni Züri und der ETH Züri gsi.
Iiri Forschigsarbet macht d Romanischtin meischtens i de Gebiet vo der historische Soziolinguischtik, der Ideology vo de Sprooche bsunders was die sproochliche Minderheite agoot, der Anthropology und em Regionalfranzösisch. Anne 2007 het d Cotelli für die sproochwüsseschaftlichi Zytschrift Vox Romanica gschaffet.
Anne 2013 isch d Sara Cotelli d Diräktoorin vom Sproochezäntrum vo der Uni Nöieburg woorde; die Abteilig het d Uni i däm Joor ganz nöi ygrichtet; me cha döört Änglisch und Düütsch go lehre. Drnäbe het d Cotelli en Lehruftrag am Nöieburger Institut für französischi Sprooch, und si macht Übersetzige vo französische wüsseschaftliche Tegscht is Änglische. Si schaffet au mit de Lüüt vom Nöieburger Institut für Sproochwüsseschaft und Komunikazioon zäme, grad au mit der Redakzioon vom Glossaire des patois de la Suisse romande.