From Wikipedia, the free encyclopedia
D Samaritaner (Samaritanisch-hebräisch שוֹמְרִים, jüdisch-hebräisch שומרונים Schomronim) si e ethno-religiöösi Gmäinschaft, wo wie s Juudedum vom Volk Israel abstammt. Es git hüte in Israel und im Westjordanland öbbe 700 Samaritaner.
D Religion vo de Samaritaner isch vo alle abrahamitische Religione em Juudedum am nöggste. D Baasis isch die Samaritanischi Torah und alles, wo s Juudedum wääred und noch dr Babylonische Gfangeschaft veränderet und ernöieret het, wird vo de Samaritaner abgläänt.
Wil si d Juude bim Widerufbau vom Tämpel um 520 v. d. Z. as nid räin israelitisch aagluegt häi und si bim Baue nid häi döfe mithälfe, häi si dr Bärg Garizim as dr richdig Ort für d Vereerig vo Gott gweelt, wil vo Garizim s Volk Israel gsäägnet worde sig (5. Buech Mose 27). Dr Messias, wo d Samaritaner erwarte, chunnt nid wie bi de Juude us em Stamm Juda, sondern us em Stamm Josef.
Au d Samaritaner häi im 1. Joorhundert n. d. Z. wie d Juude Ufständ gege d Römer gmacht, wo au underdrückt worde si. In dr Spootantike häi si in de Joor 484 und 529 König kröönt, wo aber vo de Römer gfangegnoo und umbrocht worde si.
Im Middelalter het s no zimli vili Samaritaner gee aber denn isch iiri Gmäinschaft wäge dr Islamisierig gschmulze, bis dass im Joor 1918 d Brite in iirem Mandatsgebiet nume no 146 Samaritaner zelt häi. Die si in fümf Familie, wo mitenander verwandt gsi si, iidäilt gsi. Wäge dr stränge Endogamii, wo d Samaritaner sit langem braktiziert häi, git s nid wenig gsundhäitligi Brobleem.
Am 1. Januar 2015 het s 777 Samaritaner gee. Si lääbe in zwäi Siidligsgebiet. Die äinti Grubbe woont im israelische Holon und isch stark in dr israelische Gsellschaft integriert. Si schwätzt Hebräisch, Hüroote zwüsche Samaritaner und Juude si erlaubt und d Gmäind isch am Waggse. Die zwäiti Grubbe läbt z Nablus im Westjordanland, schwätzt Arabisch und wird vilmol vo israelische Soldate für Palestinänser ghalte und schlächt behandlet und häi wäge däm Brobleem mit iirer Identidäät.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
