Klassische Moderne

Mit em Begriff Klassischi Modärne bezeichnet mä d Vilfalt vo de heterogene, avantgardistische Stilrichdige in dr Bildende Kunst vom Ändi vo dr Belle Époque bis in d Middi vom 20. Johrhundert wie dr Dada, dr Expressionismus, dr Kubismus, dr Futurismus, dr Abstraktivismus und vili anderi «-isme», wo mä hüt no as bahnbrächend aaluegt. Mooler wie zum Bischbil dr Max Beckmann, dr Wassily Kandinsky, dr Pablo Picasso, dr Franz Marc, dr Paul Klee, dr Henri Matisse, dr Georges Braque, dr Piet Mondrian, d Elfriede Lohse-Wächtler si dodrfür typischi Verdräter. Z Russland het sich e russischi Modärne entwigglet, wo mä–näbe Literate, Komponiste oder em Dänzer Djagilew–dr Marc Chagall und dr Wassily Kandinsky drzue zelt. D Modärne vo dr Architektur umfasst e Stilkomplex, wo Archidekte wie dr Frank Lloyd Wright, dr Le Corbusier, dr Ludwig Mies van der Rohe, dr Konrad Wachsmann oder dr Oscar Niemeyer drzue ghöre. S dütsche Bauhuus stoht uuse as e kulturelli Keimzelle vo dr Modärne. Z Östriich gältet das bsunders für en Archidekt Adolf Loos und d Archidekte und Verdräter vo dr aagwändete Kunst, wo d Wiener Wärkstatt bildet hai.

Juan Gris: «Porträt vom Pablo Picasso», Art Institute of Chicago, 1912