Jean-Daniel Blavignac

Dr Jean-Daniel Blavignac, wo am 15. Mai 1817 z Gämf uf d Wält choo und am 21. Februar 1876 gstorben isch, isch e Schwiizer Architekt, Gschichtschryber und Volchskuntler gsi.

Porträt us de Sammligevo de Bibliothèque de Genève

Em Jean-Daniel Blavignac sy Vatter isch Töpfer gsi. Dr Jean-Daniel het z Gämf d Kunschtschuel und d Induschtryschuel bsuecht und isch füüf Joor bim Architekt Jean-Pierre Guillebaud s Boue go leere. Als Architekt und guete Könner vo dr mittelalterliche Kunschtgschicht het er bi dr grossi Reschtaurierig vo dr Kathedraale Saint-Pierre z Gämf mitgschaffet. Anne 1851 het er d Boute fürs Äiggnössische Schützefäscht z Gämf entwoorffe. Die eigete Bouwäärch, wo s vo iim no git, sind es paar Brünne z Carouge und es Huus am Boulevard de la Cluse z Gämf.

Dr Blavignac isch im Stadtroot vo Gämf gsi, het e Zyt lang zu de Freimuurer ghöört und isch am Änd 1869 zum katolische Glauben überträtte, was men em schynts im protestantische Gämf zimli übel gnoo het.

Sid 1845 isch dr Gämfer als schrybends Mitgliid bi dr Akademy vo Savoie drby gsi. Und au bi Schwiizer Verein het er mitgmacht, öppe bi dr Société d’Histoire de la Suisse romande. 1866 het er mit eme Gschichtsbuech vo Carouge agfange. Me könnt en als Autoor vo verschidene kulturgschichtlichen Arbete. Sys Buech L’Emprô genevois isch e grossi komentierti Samlig vo Sprüüch und Gschichten im Patois, dr Variante vo dr Arpitanische Sprooch i dr Regioon Gämf.

Wäärch

• Journal, em Blavignac sys Tagebuech
• Description monumentale de l’église de Saint-Pierre, ancienne cathédrale de Genève, 1845
• Description monumentale de l’église Notre-Dame, ancienne cathédrale de Lausanne, 1845
• Notice historique sur le cimetière de Genève, 1849
• Armorial genevois, 1849
• L’Histoire de l’architecture sacrée du VIe au Xe siècles dans les anciens évêchés de Genève, Lausanne et Sion, 1853
• Comptes de dépenses de la construction du clocher de Saint-Nicolas à Fribourg, en Suisse, de 1470 à 1490, 1858
• Recherches historiques et littéraires …, 1865
• Le Christianisme à Genève depuis Saint-Pierre jusqu’à présent, 1872
• Études sur Genève, 1872, 1874
• La cloche: étude sur son histoire et sur ses rapports avec la société aux différents âges, 1877
• Histoires des Enseignes, d’Hotelleries, d’Auberges et de Cabarets, 1878
• L’Emprô genevois, 1879

Literatur

• Leïla El-Wakil (Hrsg.): Jean-Daniel Blavignac: architecte-caméléon. In: ZAK, 39, 1982, S. 277–290.
• Leïla El-Wakil (Hrsg.): Jean-Daniel Blavignac 1817–1876. Carouge, 1990
• Ariane Girard: Blavignac (Jean-Daniel, 1817–1876). In: Dictionnaire Carougeois, 1997, Band III B, S. 426–427.
• Fabrizio Frigerio: La vie maçonnique de Jean-Daniel Blavignac d’après son Journal personnel (1854-1862). In: Masonica, Lausanne, 10, 2000, S. 3–17.