Gemeindepräsident

E Gmäindibresidänt oder Gmäindsbresidänt (im Kanton Friburg Ama^[1] (oder inoffiziell Sändigg, Sendigg), im Kanton Aargau Gmeindamme oder Stadtamme^[2], im bünderische Tavaas Landamme, im Kanton Appäzäll Innerrhode Bezirkshoptme oder churz Hoptme) isch s Ooberhaupt von ere schwizerische politische Gmäind und wird vo de Stimmbürger vo dr Gmäind gweelt.

Funkzioone und Ufgoobe

Dr Gmäindibresidänt isch verantwortlig für d Läitig vo sinere Kollegiaalbehörde, isch also dr Schef vo dr Exekutiive, Er kümmeret sich drum, ass d Gsetz vom Kantoon und Bund usgfüert wärde, wenn das Däil vo de Ufgoobe vo dr Gmäind isch, und um alli Reglemänt, wo d Gmäind erloot. In chliinere Gmäinde isch er mäistens au dr Vorsitzend vo dr Gmäindiversammlig, wo s oberste Legislatiive Organ von ere politische Gmäind isch.

Gmäindibresidänte wärde mäistens an dr Urne, vo dr Gmäindiversammlig oder indiräkt dur s Gmäindiparlamänt gweelt. D Amtszit isch zwüsche zwäi und fümf Joor lang. Im Kanton Friburg konstituiert sich dr Gmäindiroot, wo vom Volk gweelt worde isch, sälber, und weelt au d Gmäindibresidänt.

Dr Gmäindibresidänt het vilmol e starki Machtposizioon, wil er dr Gmäindiroot, d Gmäindiversammlig und d Gmäindiverwaltig läitet. Wil d Ufgoobe in modärne Gmäinde immer komplexer und vilfältiger wärde und e groosses fachligs Wüsse, zitligs Angaschemänt und persöönlige Iisatz verlange, cha das vilmol nüme vom e Milizpresidänt gläistet wärde. Es bestoot dorum d Tendänz zum Vollamt und Gmäindibresidänt wird mee und mee e Bruef.

Liddratuur

• Peter Steiner: Gemeindepräsident. In: Historisches Lexikon vo dr Schwiiz.
• Peter Steiner: Ammann. In: Historisches Lexikon vo dr Schwiiz.

Fuessnoote

1. Gsetz vom 25. Septämber 1980 über d Gmäinde, Art. 58.
2. Gsetz über d Iiwoonergmäinde vom 19. Dezämber 1978, § 16.