Fredy Schär
From Wikipedia, the free encyclopedia
From Wikipedia, the free encyclopedia
Dr Buur Fredy Schär (* 18. Jänner 1964) isch e Schwyzer Liedermacher, Trubadur, Kabarettischt und Witzverzeller.
Si gleerti Bruef (Buur) isch si neui Freizitbeschäfftigung worde und si alti Freizitbeschäfftigung (Unterhalter) isch jetz dr neu Bruef. Är het scho in dr ganze Dütschschwyz und im alemannische Ussland sini Uftritt gha.
Dr Fredy Schär isch am 18. Jänner 1964 uf d’Wält cho und isch z`Häfelfinge und z`Gälterchinde, also im Baselbiet ufgwachse. D`Primarschuel het är z`Häfelfinge und z`Gälterchinde bsuecht. Denn isch är in d`Sekundarschuel z`Gälterchinde gange in die progymnasischi Klass. Scho wärend dr Schuelzit het me gse, dass dr Fredy kabarettischtischs Talänt chönnti ha. Die künschtlerischi Odere het är villicht vo sim Grossätti, em Karl Pümpin, g'erbt. Au musikalisch isch är recht früe ufgfalle, denn är isch dr Sänger und Bassgitarrischt von ere Schüelerbänd gsi. Sini grosse musikalische Vorbilder si dr Paul McCartney vo de Beatles und natürlich dr Bärner Trubadur Mani Matter.
Nach dr Schuelzit het är uf em elterliche Buurehof gschafft. Denn isch är in d`landwirtschaftlich Schuel im Eberain z`Sissech gange und het sis praktische Lehrjoor bim Meischterbuur Toni Speiser, ebefalls z`Sissech, hinter sich brocht. Einigi vo sine erschte Uftritt het är an de Abschlussöbe vo dr landwirtschaftliche Schuel gha. Dört het dr Fredy zu verschidene Melodie d`Eigeheite vo de Landwirtschaftsleerer nogmacht.
Als junge Buur het dr Fredy Schär immer mee Uftritt als Unterhalter gha. Jedes Wuchenändi isch an den Öbe „öppis los“ gsi. Si künschtlerischi Näbetätigkeit het immer me d`Oberhand übernoo.
1998 het dr Fredy dr Buurehof vo sine Eltere überno. D`Vehwirtschaft und sini Uftritt z`Obe (jetz au immer mer under dr Wuche) under ei Huet z`bringe isch immer schwiriger worde. Ständig het är müese für d`Stallarbet nach ere Verträtig sueche. Sini Chüe hei müese gfueret und gmulche werde und är het jo nit chönne an beide Orte si. So het är sich entschlosse ufs Melche z`verzichte und so buuret är vo denn a oni Vee. So schafft är jetz numme no uf em Feld.
Dr Fredy, wo im Männerchor Gälterchinde im erste Tenor singt, macht au immer Fasnacht. Zäme mit eme Kolleg singt är Schnitzelbänk unter em Name „D Luusbuebe“. Sit 2005 singt är ellei als „Dr Entlarvti“.
Scho wit über tusig Uftritt het dr Liedermacher Fredy Schär unterdesse hinter sich brocht. Är isch scho vor verschidene Grössene vo Wirtschaft und Politik ufträtte und vom Altbundesrot Adolf Ogi gloobt worde.
Scho e paar Mol het me dr Fredy Schär chönne bi churze Uftritt oder Gschpröch uf verschidene Radio- und Färnseesänder ghöre und gse. Im Dezämber 2001 het dr Fredy zwe Wuche z`Basel im Fauteuil-Theater, im sogenannte „Taburettli“, gaschtiert. Am einedrissigschte Merze zweutusigundzwölf het dr Fredy e churze Uftritt im Schwyzer Färnsehe gha und zwar in dr Sändig Samschtig-Jass.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
