From Wikipedia, the free encyclopedia
De Ernst Eggimann (* 23. Apriu 1936 z Bärn; † 16. Juni 2015 bi Arles) isch e Schwiizer Mundartdichter gsi. Är isch eine vo de Gründer vor Gruppe Oute gsi.
Dialäkt: Bärndütsch |
De Ernst Eggimann isch em 23. Apriu 1936 uf d Wäut choo. Är het sech z Bärn zum Lehrer uusbiude la und het den a de Sek Langnou im Ämmitau ungerrichtet. Ane 1963 het er zwoo Erzälige uf Hochtütsch useggäh. Bekannt worde isch är 1967 mit em Band Psalmen, won är i modärne Wort sini Visione vo Gott umschribe het, es Wärch wo bsungers bi tütsche Theologe guet achoo isch. Im gliiche Jahr isch im de Literaturpriis vor Stadt Bärn verliehe worde. Sini erste Mundartvärs si 1968 im Band Henusode usechoo. Sis letschte Wärch het er 1981 publiziert. Vo 1986 bis 1997 isch der Ernst Eggimann für di Freyi Liste im Groossraat vom Kanton Bärn gsässe. Nach sinere Pensionierig het är zrüggzoge i sim Huus z Langnou gläbt u het später si Läbesabe im ne Dorf bi Arles z Südfrankriich verbracht. Nachdäm sech si Gsundheitszuestang verschlächtert gha het, isch är dört ane 2015 gstorbe.