Drache

E Traach (ahd. traccho us lat. draco und agr. δράκων, drákōn »Traach, Schlange«) isch e Fabeltier wo weltwiit bikannt isch. Je noch Kultur chönde si recht verschide uusgsie.

e tibetische Traach

Germane

Bi de Germane sind Traache recht biliebt, bsunders i de Heldesaage. Debii isch di usem Latiin entleenti Bizaichnig verbraiteter as iihaimisch Binennige, wi tütsch Lindwurm. S Bild wo d Germane vomene Traach ghaa hend, underschaidet sich starch vom moderne Traachebild, wo vo asiatische Vorstellige starch beiflusst isch. Traache sind schlangeäänlich gsii und hend Gold öber ales gliebt, da gsammlet und druf gnestet. Si sind gföörlichi Tier gsii und s Töte vomene Traach e Heldetaat sondergliiche.

Noch de nordische Mythologii nagt de Traach Nidhöggr a de Worzle vom Weltbomm Yggdrasill. De birüemtisch Traach isch aber de Fafnir, wo vom Sigurd tötet woren isch.

I de Kunst vo de Wikinger sind Traache wichtig gsii und eri Schiff sind mit Traachechöpf verzeirt gsii, werum die Schiff Traacheschiff gnennt were. Au d Dachfirst vo de skandinavische Stabchile sind mit Traachechöpf verziert.