Bundesplatz (Bern)

De Bundesplatz esch de Platz direkt vorem Bundeshus in de Stadt Bärn i de Schwiiz.

De Bundesplatz vor em Bundeshuus z Bärn

Uf em Platz fended Staatsempfäng, politischi Kunggäbige ond diversi Verastaltige statt, jewils am Zischtig ond am Samstig fendet Wochemarkt drufe statt. En uf d Geometri vom Bundeshus bezognigs Rächteck vo 60x30 Meter us Naturstei dominiert de Platz. Die 60x100 cm grosse ond 6 cm dicke Platte us Valser Gneis send spiegusymmetrisch verleid, sodass grossflächigi Ornamant entstönd. Dorch es licht gschwunigs Lichtband, wo de Platz dorchzieht, wird en optische Verbinding vom Bäreplatz zom Bundeshaus hergstöllt. Im westleche Teil vom Platz befindet sech es Wasserspiil us 26 Wasserfontäne, wo die 26 Kantön vo de Schwizer Eidgenosseschaft symboliesiered. A de Südsite vom Platz stönd s Parlamantgebäude und d Bundeshüser, uf de Ostsite stods Hauptgebäude vo de Schwizerische Nationalbank, uf de Westsite vom Platz s Hauptgebäude vo de Bärner Kantonalbank. Uf de Nordsite gränzt de Platz a Bäreplatz ond witeri Bank- ond Verwaltigsgebäude. A de vier Ecke vom Platz befendet sech d Bundesgass, d Kochergass, d Amtshusgass ond d Schauplatzgass.

Gschecht

De Bundesplatz esch um 1902 entstande glichzitig med em Bau vom Parlamentsgebäude. För de Bau vom Gebäude ond vom Bundesplatz hed de Architekt Hans Willhem Auer es Casino ond anderi Hüser lo abrisse, wo die freii Sicht uf s Bundeshus versperrt hättit.

Jahrelang esch de Platz als Parkplatz benötzt worde. 1991 esch en nationale Gstaltigswettbewerb duregfüert worde, s Siigerprojekt "Platz als Platz" esch zwische 2002-2004 realisiert ond am 31.Juli ond 1. August 2004 offiziel igweiht worde. S Projekt "Platz als Platz" esch 2006 med em Pris Honor Award for Urban Design, verleiht vom American Institute of Architects, uszeichnet worde.

Weblenk

• Website vom Bundesplatz

46.9472222222227.4441666666667