Artur Fischer

De Artur Fischer (* 31. Dezember 1919 z Tumlinge, † 27. Januar 2016 z Waldachdal) isch en glernte Bauschlosser, Unternehmer und Erfinder gsi. Er het wit über 1000 Patent und Bruchsmuschter für sini Erfindige gha.

Läbe

Scho als chline Bueb het de Artur Fischer sini erschte Erfindige gmacht. Mit 38 het er dann eini vo sine bekannteschte Erfindige uf de Märt brocht, de S-Dübel us Polyamid. Au s „fischertechnik“-Baukaschtesyschtem und es Blitzliechtgrät für Fotiapparät mit ere synchrone Uslösig im 1949, ghöre zu sine bekannteschte Erfindige. En Dübel zum Fixiire vo Chnochebrüch het er ebeso erfunde, wi es essbars Chinderspiilzüg us Härdöpfelstärcki, wo mit em Name fischer TiP verchauft wird.

Sini 1948 gründt Firma Fischerwerke het er im 1980 an sin Sohn Klaus Fischer übergeh. S Unternehme het im 2013 en Umsatz vo öppe 618 Millione Euro gha.

De Artur Fischer het bis Endi 2013 insgsamt 1136 Patent und Bruchsmuschter aagmeld gha und zählt zu de erfolgrichschte Erfinder vo de Wält.

Uszeichnige

• 1968: Verdienschtchrüz am Band vo de Bundesrepublik Dütschland
• 1976: Verdienschtchrüz 1. Klasse vo de Bundesrepublik Dütschland
• 1980: Verdienschtmedaille vom Land Bade-Württebärg
• 1986: Rudolf-Diesel-Medaille
• 1990: Werner-von-Siemens-Ring
• 1991: Großes Verdienschtchrüz vo de Bundesrepublik Dütschland
• 2006: Großes Verdienschtchrüz mit Stärn und Schulterband vo de Bundesrepublik Dütschland
• 2009: Dütsche Gründerpriis, Kategorii Läbeswärch
• 2014: Europäische Erfinderpriis, Kategorii Läbeswärch

Literatur

• Helmut Engisch, Michael Zerhusen: Die Fischers. Eine schwäbische Dübel-Dynastie. Theiss, Stuttgart 1998, ISBN 3-8062-1341-0.
• Kathrin Wilkens: Der Herr der Dübel. In: Technology Review (deutsche Ausgabe) Mai 2004, Seite 92.

Weblink

• Offizielli Website vo de fischerwerk
• „Dübelkönig“ Artur Fischer ist tot, FAZ, 29. Jänner 2016