Werterbuech vu dr dytsch-lothringische Mundarte
From Wikipedia, the free encyclopedia
Im eibändige Werterbuech vu dr dytsch-lothringische Mundarte (dt. Wörterbuch der deutsch-lothringischen Mundarten) isch dr Dieläktwortschatz vu dr dytschsprochige Deil vu Lothringe ufgnuu. Im Gegesatz zum Pfälzische un Rhyynische Werterbuech verzeichnet des Werterbuech nume die Werter un Wändige, wu vu dr hochdytsche Schriftsproch abwyyche. Dodermit isch s Lothringisch Werterbuech wie au s Elsässisch Werterbuech e Idiotikon. Wel fir dr lothringisch Dieläktruum fascht keini schriftlige Quälle us dr eltere Zyt vorlige, diene vor allem Urkunde us dr frieje Nejzyt un Frogebege us Lehrerbefrogige as Quälle. Im Werterbuech het s Verwys in s Elsässisch Werterbuech, wu scho anne 1907 abgschlosse woren isch.
Dialäkt: Undermarkgreflerisch |
Verfasst wore isch lothringisch Werterbuech vum Michael Ferdinand Follmann.
Materialbasis vum Werterbuech isch e Sammlig gsi, wu ab 1900, no dr Grindig vu dr Kommission dur d Gesellschaft für lothringische Geschichte 1898, zämmedrage woren isch. Näbe dr Frogebege, wu vum Louis Gustave Liebich (1824 - 1910) fir e Elsässischi Grammatik abgfrogt wore sin un Erzerpte us eltere Urkunde sin s vor allem handschriftligi Sammlige vu Lehrer un vu andre Privatlyt, wu fir s Werterbuech brucht wore sin. s Werterbuech isch anne 1909 vereffentligt wore.
Im Projekt „Werterbuechnetz“, wu im „Kompetenzzentrums für elektronische Erschließungs- und Publikationsverfahren in den Geisteswissenschaften“ an der Universitet Trier entstoht, isch e Online-Version vum Dytsch-Lothringische Werterbuech gmacht wore, wu mit anderen Werterbiecher vernetzt isch.
In dr letschte Johre sin e baar nejeri Ortswerterbiecher vu lothringische Dieläkt erschine.