Staffelei

E Staffelei isch e Gstell, wo mäistens us Holz oder Metall gmacht isch und wo d Mooler bim Moole iiri Bilder dra befestige. Eme Gmäld, wo uf ere Staffelei gmoolt worden isch, säit mä Staffeleibild im Geegesatz zur Wand- und Deckimoolerei, wo s Gmäld diräkt uf dr Wand oder Decki ufgmoolt wird. S Wort chunnt vo dr veraltete Bezäichnig Staffle für e Sprosse von ere Läitere.

Staffelei

Wie d Staffelei gmacht isch

Für dass d Staffelei uf jedem Boode sicher cha stoo het si drei Bäi, zwäi vorne nooche, wo fest mitenander verbunde si und wo mä s Bild cha draa aamache und e dritts, wo mit de andere bäide mit eme Scharnier verbunde isch so, dass mä d Staffelei meer oder weniger schreeg cha ufstelle. An dr vordere Site het s e Kweerholz. Das lit uf Bolze, wo im lingge und rächte Bäi stecke. Uf das Kweerholz stellt mä d Liinwand. Die Bolze cha mä uufe und aabe verschiebe und eso d Hööchi vom Bild vom Boode us verändere.

Arte

Staffeleie in Ateliee si mäistens seer schweer und dorum nimmt mä sä sälte uuse zum in dr freije Natuur z moole. Für das git s liichteri Fäldstaffeleie, wo mä cha zämmeklappe.

Verwändig

Dr Caspar David Friedrich in sim Ateliee vor sinere Staffelei

E Hufe Mooler bordretiere sich sälber, wie si an dr Staffelei moole. Dr Goya oder dr Diego Velázquez (in "Las Meninas") häi sich uf groosse Ufdraagsgmäld hinder iirer Staffelei daargstellt as subjektivi Beobachter vo de Persoone, wo si gmoolt hai. Die befründete Mooler Camille Pissarro, Claude Monet und Pierre-Auguste Renoir häi vilmol iiri Staffeleie näbenenander ufgstellt und jeede het in sim äigene Stiil s gliiche Motiv gmoolt.

Wüssenswärts

S Stärnbild Mooler isch 1752 vom franzöösische Astronoom Nicolas Louis de Lacaille iigfüert worde. Uf eltere Stärncharte wird s mäistens as Staffelei mit Bimsel daargstellt.

Weblingg

 Commons: Easels – Sammlig vo Multimediadateie

Dä Artikel basiert uff ere fräie Übersetzig vum Artikel „Staffelei“ vu de dütsche Wikipedia. E Liste vu de Autore un Versione isch do z finde.