![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/3/37/Yazilikaya34-39.jpg/640px-Yazilikaya34-39.jpg&w=640&q=50)
Sauska
From Wikipedia, the free encyclopedia
D Sauska, älter au Sausa (z Ugarit: ṯuṯk), isch di hurritischi Liebes- und Chrieggöttin. De hurritisch Name bidüttet ‘Groossi’.
![Thumb image](http://upload.wikimedia.org/wikipedia/commons/thumb/3/37/Yazilikaya34-39.jpg/640px-Yazilikaya34-39.jpg)
D Sauska isch nebetem Wettergott Tessub di wichtigsti Gotthait vo de Hurriter gsii. Si isch d Schwöster vom Tessub und d Töchter vom Kumarbi. Si het meriri Biglaiterine, di zwoo wichtigste sind d Ninatta und d Kulitta. Si isch scho früe a di mesopotamischi Göttin Ištar vo Ninive aagliche woore. Im Mitanni-Riich und bi de Osthurriter isch si di wichtigsti Göttin gsii, bi de Westhurriter isch si zom Tail vo de Ḫebat zruggdrängt wore. Im hethitische Felshailigtum Yazılıkaya isch d Sauska i de männliche Götterprozession zäme mit de Ninatta und de Kulitta abbildet. Si werd immer mit zwee Flögel abbildet, wo us de Schultere wachset. Obwoll d Sauska uusdrüggli as e erotisch raizvolli Göttin bischribe werd, cha si as Chriegggöttin au männlich dargstellt were.
I de neohethitische Zitt werd d Sauska witter vereert. Imene Relief us Arslantepe stoot si uf zwee Vögel und het wie i bronzezittliche Abbildige zwee Flögel.