From Wikipedia, the free encyclopedia
Dr Richard Boyle, 3. Earl of Burlington und 4. Earl of Cork, PC (* 25. April 1694 in Yorkshire; † 15. Dezämber 1753) isch e britische Aadlige und Archidekt gsi. Er isch äine vo de wichdigste Iniziatoore vom änglische Palladianismus gsi.
Dr Boyle isch dr äinzig Soon vom Charles Boyle, 2. Earl of Burlington und 3. Earl of Cork gsi. Er isch au an Muusig intressiert gsi und het dr Georg Friedrich Händel in sim Woonhuus Burlington House lo woone. Dr Händel het em zum Dank drei Opere gwidmet.
Dr Boyle het im Alter vo zääni si Ditel und groossi Ländereie in Yorkshire und Irland gerbt. Er het drei Grand Tour gmacht, 1714, 1719 und 1726. Er isch uf em öiropäische Kontinänt umegräist und vor allem in Italie. Dört isch er mit dr italiänische Archidektuur in Berüerig choo. D Archidektuur vo dr römische Antike het en kuum intressiert, aber wie sä dr Scamozzi und bsundrigs dr Andrea Palladio interbretiert häi, scho.
Sis erste Brojekt isch 1719 s äigene Woonhuus in Piccadilly gsi, s Burlington House, wo zerst dr James Gibbs dra gschafft het. Wo dr Boyle aber vom Kontinänt zruggchoo isch, het er en entloo und sälber zämme mit em schottische Archidekt Colen Campbell und em Innenarchidekt William Kent am Umbau vom Huus gschafft. Der Hoof vom Burlington House gältet as die ersti Umsetzig vom Nöi-Palladianismus im Veräinigte Köönigriich.
Vor allem mit em William Kent het er lang zämmegschafft: si häi 1726-29 Chiswick House entworfe, e chliini Villa, wo die oktogonali Form vom Palladio sinere Villa Rotonda bi Vicenza (1550 baut) ufgrift. Schloofzimmer oder e Chuchi git s im Chiswick House nit. Es isch nume brucht worde, zum im Burlington si Architekturbibliothek und Sammlig ufbewaare. Dr Garte goot vor allem uf e William Kent und Charles Bridgeman zrugg. Er gältet as s früeste Bischbil für die moolerischi Noochformig von ere antike Landschaft und isch eso e Vorlöifer vom änglische Landschaftsgarde.
In de früeje 1730er Joor het sich dr Palladianismus as dr vorherrschendi Stiil für Landsitz und öffentligi Geböid duuregsetzt.
Hanno-Walter Kruft: Geschichte der Architekturtheorie. Münche 1985, S. 269
 |
Dä Artikel basiert uff ere fräie Übersetzig vum Artikel „Richard_Boyle,_3._Earl_of_Burlington“ vu de dütsche Wikipedia. E Liste vu de Autore un Versione isch do z finde. |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
