![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/d/da/Puppenhausmuseum_2008-03-30.jpg/640px-Puppenhausmuseum_2008-03-30.jpg&w=640&q=50)
S Spiilzüüg Wälte Museum Baasel
From Wikipedia, the free encyclopedia
S Spiilzüüg Wälte Museum Baasel, bis 2012 Diddihuusmuseum Basel, befindet sich in dr Schwizer Stadt Basel und isch s grösste Museum vo siner Art in Europa. Es ghöört dr Mäzenin Gigi Oeri und isch vo iire ufbaut worde. D Eröffnig isch 1998 gsi.
![Thumb image](http://upload.wikimedia.org/wikipedia/commons/thumb/d/da/Puppenhausmuseum_2008-03-30.jpg/640px-Puppenhausmuseum_2008-03-30.jpg)
Dialäkt: Baseldütsch |
S Museumsgeböid isch am Barfüesserblatz zmidst in dr Stadt und stammt us em Joor 1867. Es isch vo Grund uf renowiert worde und uf em nöiste Stand vo dr Technik. Alli Ustelligsrüüm, vom Barderr bis zum oberste Stock, si für Rollstuelfaarer zuegängig.[1] S Museum het vier Stöck und en Usstelligsflechi vo 1000 m². Es zäigt mee as 6000 Exponat in fantasiivoll arrangschierte Szeene. Mä cha Diddi und Diddihüüser, Lääde, Wiichäller, Mässständ und anderi Miniatuure bewundere. D Teddybääreustellig het mee as 2500 Stück und isch vo iirem Umfang und iirer Qualidäät us äinzigartig uf dr ganze Wält. In dr ständige Ustellig vo neapolitanischer Volkskunst cha mä italiäänischi Alldaagsszeene gsee.[2] Es git en interaktivs Informazioonssüsteem, wo d Hintergründ vo de Usstelligsstück erkläärt.
Es finde au regelmäässig Sonderusstellige statt. So isch 2005/2006 e Modäll vom Bärnstäizimmer im Katharinebalast bi Sankt Petersburg usgstellt worde, wo dr Uwe Habermann us Nordfriesland zwüsche 1993 und 2003 im Massstaab vo 1:12 nochbaut het. Aber nid alli Ustellige häi diräkt öbbis mit Spiilzüüg z due. So het s im 2011 en Ustellig über d Brülle gee.