![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/9/99/Franz_Xaver_Winterhalter_Napoleon_III.jpg/640px-Franz_Xaver_Winterhalter_Napoleon_III.jpg&w=640&q=50)
Napoléon III.
From Wikipedia, the free encyclopedia
Dr Napoleon III. (frz. Napoléon III; * 20. April 1808 z Paris; † 9. Januar 1873 z Chislehurst bi London), isch under siim ursprünglige Name Charles-Louis-Napoléon Bonaparte währed dr Zweite Republik vo 1848 bis 1852 dr französisch Staatspresidänt und vo 1852 bis 1870 as Napoleon III. Kaiser vo de Franzose gsi.
![Thumb image](http://upload.wikimedia.org/wikipedia/commons/thumb/9/99/Franz_Xaver_Winterhalter_Napoleon_III.jpg/640px-Franz_Xaver_Winterhalter_Napoleon_III.jpg)
Dr Louis Napoléon isch uf em Schloss Arenebärg z Salestei am Bodesee im Kanton Thurgau, uf Seeheim bi Konstanz am Bodensee und z Augsburg ufgwachse, und het perfekt Schwiizerdütsch gschwätzt. Er isch 1829 uf d Artilleriischuel vo Thun gange, het denn as Artilleriioffizier in dr Schwiizer Armee dient und isch 1832 im Kanton Thurgau Ehrebürger worde.
Dr Louis-Napoléon Bonaparte isch noch dr Februarrevolution 1848 uf Frankriich zrugg und het im Dezämber bi dr Presidäntschaftswahl gege dr bishärig Presidänt Louis-Eugène Cavaignac gwunne. Mit eme Staatsstreich het er am 2. Dezämber e Diktatur errichdet, und sich im Johr druf noch ere Volksabstimmig zum Kaiser vo de Franzose lo usrüefe. Am Afang isch d Herrschaft vom Napoleon III. autoritär gsi, in de 1860er Johr isch si liberaler worde. Im Dütsch-Französische Chrieg isch er am 2. Septämber 1870 in dr Schlacht vo Sedan vo de Preusse gfangegnoh worde. Zwei Dag druf isch z Paris die Zweiti Republik usgrüeft worde. Noch em Chrieg het er z Ängland gläbt. Er het Plän gschmiidet noch Frankriich zruggzgoh, isch aber am 9. Januar 1873 an de Folge von ere Operation gstorbe.