![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/3/3a/Aeshna_cyanea_-_larva_%2528aka%2529.jpg/640px-Aeshna_cyanea_-_larva_%2528aka%2529.jpg&w=640&q=50)
Larve
From Wikipedia, the free encyclopedia
E Larve (vo lat. lar, Plural: lares (römischi Schutzgottheite) – bedütet ursprünglig Maske oder Gspängst) isch in dr Zoologii e Zwüscheform in dr Entwicklig vom Ei zum Erwachsenestadium, wo bi Dier vorchunnt, won e Metamorphose duremache.
![Thumb image](http://upload.wikimedia.org/wikipedia/commons/thumb/3/3a/Aeshna_cyanea_-_larva_%28aka%29.jpg/640px-Aeshna_cyanea_-_larva_%28aka%29.jpg)
Die bekanntiste Diergruppe mit eme Larvestadium si d Insekte und d Amphibie. De Larve vo de Froschlurch sait me Rosschöpf, bi de Insekte heisse si under anderem Made oder Rupe; as Finne bezeichnet me s Larvestadium bi Bandwürm.
Larve gsehn ganz anders us as s usgwachsene Dier und hai hüfig au e ganz anderi Läbenswiis. So läbe zum Bispil d Larve vo Schnoogge oder Libälle im Wasser, währed s usgwachsene Insekt (Imago) uf em Land und in dr Luft läbt. Wenn die junge Dier keini eigene Larvalmerkmol hai, so redet me von ere Nymphe.
Nit immer isch s Larvestadium nume e churzi Übergangsphase; es cha durchus dr grösst Deil vom Läbe vom ene Dier usmache. So läbt dr Maiechäfer zwei bis fümf Johr as Larve (Ängerling), as usgwachsene Chäfer numen e baar Wuche. No extremer gseht s bi de Eidagsfliege us. Noch dr Umwandlig zum Imago läbe mänggi Arte nume non e baar Stunde. Denn git s no Arte, bi dene wärde scho d Larve gschlächtsrif und si füehre d Verwandlig nie dure (die so genannti Neotenii), zum Bispil dr mexikanischi Axolotl-Molch.
- D Larve vom Grosse Schwarzchäfer (Zophobas morio)
- D Larve vom ene Bockchäfer
- D Larve (d. h. dr Rosschopf) vom Haswell Frosch (Paracrinia haswelli )
- D Larve von ere Steifliege (Plecoptera)
- D Larve von eme Tatzechäfer