Germersheimer Linie

Germersheimer Linie oder Pund/Pfund-Linie wird in dr Sprochwisseschaft d Isoglosse gnännt, wu verschobene p im Aalut vum uuverschobene p drännt. In dr Dialäkt nerdlig vu däre Linie sait mer Pund, Paif, Parrer, sidlig sait mer Pfund, Pfaif, Pfarrer (im Weschte) bzw. Fund, Faif, Farrer (im Oschte). D Germersheimer Linie verlauft zem Dail parallel zue dr Speyerer Linie (Appel/Apfel-Linie), in dr Literatur wird nit immer klar unterschide zwische däne bode Isoglosse. D Germersheimer Linie isch näbe dr Speyerer Linie aini vu dr wichtige Abgränzige vu dr oberdytsche zue dr westmitteldytsche Dialäkt.

Dialäkt: Undermarkgreflerisch

Verlauf vu dr Germersheimer Linie

Verlauf

D Germersheimer Linie isch Dail vum Ryynische Fächer. Si goht vu dr Vogese uus, fascht idäntisch mit dr Speyerer Linie bis zum Ryy im Side vu Germersheim. Dert dränne sich di bode Linie, d Germersheimer goht derno iber Phillipsburg – Wiesloch– Adelsheim – Buchen – Walldürn bis zum Main im Oschte vu Stadtprozelten. Bi Gemünden drifft si wider uf d Speyerer Linie un verlauft derno zämme mit däre bis uf Vacha, wu si sich wider dränne. Im Oschte vu Kassel drifft d Germersheimer uf Benrather Linie, wu di mitteldytsche vu dr niiderdytsche Dialäkt drännt un verlauft zämme mit däre bis an d Oschtgränze vum dytsche Sproochruum, hite an dr Oder, friejer bis uf Oschtpreuße.