![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/74/Paris_Comedie-Francaise_exterior.jpg/640px-Paris_Comedie-Francaise_exterior.jpg&w=640&q=50)
Comédie-Française
From Wikipedia, the free encyclopedia
D Comédie-Française (au Théâtre-Français) isch äins vo fümf Theater z Frankriich, wo dr Status vom ene Nazionaltheater (Théâtre national) häi. D Comédie-Francaise isch s äinzige vo dene Nazionaltheater, wo e fests Ensemble (la Troupe de la Comédie-Française) het. S Huus vo dr Comédie-Française befindet sich im 1. Bariser Arrondissement, em Arrondissement du Louvre.
![Thumb image](http://upload.wikimedia.org/wikipedia/commons/thumb/7/74/Paris_Comedie-Francaise_exterior.jpg/640px-Paris_Comedie-Francaise_exterior.jpg)
![Thumb image](http://upload.wikimedia.org/wikipedia/commons/thumb/1/15/Paris_Comedie-Francaise.jpg/640px-Paris_Comedie-Francaise.jpg)
![Thumb image](http://upload.wikimedia.org/wikipedia/commons/thumb/9/9f/Com%C3%A9die-Fran%C3%A7aise.jpg/640px-Com%C3%A9die-Fran%C3%A7aise.jpg)
Dr Naame vom Molière isch äng mit em Theater verbunde, wäge däm säit men em vilmol au La Maison de Molière (Im Molière si Huus). Es het immer e groosse Iifluss uf die franzöösischi Theaterlandschaft und d Schauspiilkunst ghaa.
D Comédie isch am 21. Oktober 1680 dur e Lettre de cachet vom Köönig Ludwig XIV. gründet worde. Scho am 24. August het s Ensemble, wo us 27 Schauspiiler bestande het, si ersti öffentligi Vorstellig gee: d Dragöödie Phèdre vom Jean Racine und e Komöödie vom zwäitrangige Schriftsteller Jean de La Chapelle (1651-1723). S Repertuar het vor allem us Stück vom Molière, Racine, Pierre Corneille, Paul Scarron und Jean de Rotrou bestande.
Während dr Französische Revoluzioon het dr Woolfaartsusschuss d Comédie-Française am 3. Septämber 1793 mit ere Verordnig gschlosse und d Schauspiiler verhaftet. Erst säggs Joor spööter, am 30. Mai 1799, get die nöji Regierig dä Beschluss ufghoobe und Vorfüerige im Richelieu-Saal (Salle Richelieu) erlaubt.
Am 25. Februar 1830 isch s bi dr Uruffüerig vom Victor Hugo sim Stück Hernani im Theater zur so genannte „Schlacht um Hernani“ choo. S Publikum isch gspalte gsi in d Aahänger vo dr französische Klassik und deene vo dr Romantik, wo s Stück vom Hugo äins vo de erste gsi isch drvoo. Schlussändlig häi d Aahänger vom nöiartige "romantische" Theater gwunne und Abwiichige vo de klassische Theaterregle si mee und mee verbräitet worde.
D Comédie-Française het hüte e Repertuar vo öbbe 3000 Theaterstück. Si het drei Theaterhüüser z Baris: dr Richelieu-Saal, s Théâtre du Vieux-Colombier und s Studio-Théâtre.