Bundesamt für Statistik

S Bundesampt für Statistik isch en Abdeilig vo de Bundesbhörde vo der Schwiiz.

Usgabe vom Statistische Joorbuech vo dr Schwiiz vom Aafang bis 2010.

Es heisst uf franzöösisch Office fédéral de la statistique, OFS, uf italienisch Ufficio federale di statistica, UST und uf rätoromanisch Uffizi federal da statistica, UFS. Es ghört zum Äiggnössischen Innedepartemänt EDI.

S Bundesampt tuet für s ganze Land aller Gattig Sache vo der Gselschaft, de Sprooche, dr Wirtschaft und dr Umwält aluege, drüber Date samle und alles zämerächne. Do dermit macht ’s s Wärch Statistik Schweiz, wo d Regierige vom Land und au die vo de Kantöön und d Verwaltige und au Privatpersoone chön pruuche. Äs schaffet mit de statistische Ämpter vo anderne Länder und mit em Eurostat, em Ampt für Statistik vo der EU, zäme.

Agfange het die nazionali Statistik i der Schwiiz mit der Bvölkerigszäälig vo ane 1850, und zum d Zahle nochezfüere isch ane 1860 s Äiggnössische Statistische Büro gründet worde. S Bundesampt isch sid 1998 i der Stadt Nöieburg dehei. Es het sini Arbetsgrundlaag im Bundesstatistikgsetz vo ane 1992, wo uf em Artikel 65 vo der Schwiizer Bundesferfassig stoot.

Sid 1891 chunt s Statistische Joorbuech vo dr Schwiiz use.

Literatur

• Hans Ulrich Jost: Von Zahlen, Politik und Macht. Geschichte der schweizerischen Statistik. Chronos, Zürich 2016. ISBN 978-3-0340-1330-7
• Heiner Ritzmann-Blickenstorfer: 150 Jahre schweizerischer Bundesstaat im Lichte der Statistik.In: Statistisches Jahrbuch der Schweiz 1998, Neuchâtel 1998, ISBN 3-85823-722-1

Weblink

 Commons: Bilder vom Bundesampt für Statistik – Sammlig vo Multimediadateie

• Website vom Bundesampt für Statistik (BFS)