Brunnigletscher

Dä Brunnigletscher, uf äinigä Landchartä au Brunnifirn, ischt än Gletscher im Oberalpmassiv, wo vollständig uf äm Gebiät vom Kanton Uri a dä Gränzä vom Kanton Graubündä liit. Sini mittlärä Koordinate sind 46° 44' 32" N, 8° 46' 11" O. Dä Gletscher hät ä Längi vo 3,05 km, sini mittläri Breiti ischt 1,2 km. Sini Flächi betreit öppä 2,94 km.

Brunnigletscher
de Brunnigletscher im Juli 1972
Uursprung	Oberalpstock
Längi	3,05 km
Breiti	1,2 km
Flächi	2,94 km²
Iisvolumä	0,3 km³
Abfluss/Abflüss	Brunnibach→Chärstelenbach →Rüss
Jährlichä Rückgang/ Zuäwachs	20 m Rückzug 2006
Gletscher

Beschribig

Dä Gletscher hät sin Uursprung üf ärä Höchi vo 3'000 m ü. M. südöschtlich vom Gipfel vom Oberalpstock (3160 m ü.M.) und untär dä Stremhörner. Südlich wird dä Gletscher vom Piz Auolt (3027 m ü. M.) und vom Brunnigrat flankiärt. A dä Südflankä vom Oberalpstock ischt dä Uursprung vom Staldegletscher (au Staldefirn), wo nördlich und südlich vom Oberalpstock mit äm Brunnigletscher värbundän isch. Dä Oberalpstock isch also än Nunatak genau wiä au dä Piz Tgietschen, wo än halbä Kilometer öschtlich vom Oberalpstock vo dä bäidä Ärm vom Brunnigletscher umflossä wird. Hüt (2008) ändät dä Gletscher obä am Brunnitaal oberhalb vo dä Steilwand am Taaländ und öppä 500 m weschtlich vo dä Cavardirashüttä. Aber no im Jahr 1972, wo s Foti gmacht wordän isch, isch di schroffi Gletscherzungä bis is Brunnitaal abägangä und än andäri Zungä hät über dä Cavardiraspass is Bündnärland übärägreicht, so dass mä damals no hät müssä übär dä Brunnigletscher stiigä, um vom Maderanertaal übärs Brunnitaal id Cavardirashüttä z glangä. Dä Abfluss vom Gletscher ischt dä Brunnibach, wo bi Hinterpalm im Maderanertaal in Chärstelebach flüsst. De flüsst dänn sinärsiits bi Amsteg id Rüss.

Web-Link

 Commons: Brunnigletscher – Sammlig vo Multimediadateie

• Dä Brunnigletscher uf äm Schwiizerischä Gletschermässnetz vo dä ETH-Züri

46.7368.787