From Wikipedia, the free encyclopedia
Sjarief of sjerif (Arabies vir "heer") is ’n tradisionele Arabiese titel wat in Arabiese lande gegee word aan afstammelinge van die profeet Mohammed.
Daar is twee takke: die Hassaniede en die Hoesseiniede. Mohammed het ’n dogter, Fatima, gehad wat met Ali, die vierde kalief, getroud was. Hulle het twee seuns, Hassan en Hoessein, gehad. Die manlike afstammelinge van Hassan het by voorkeur die titel "sjarief" gekry en die afstammelinge van Hoessein die titel sajjid, maar die titels is dikwels deurmekaar en naas mekaar gebruik. Vroue het die titel "sjariefa" of "sajjida" gekry.
Van 1201 tot 1925, toe die Hedjaz deur Ibn Saoed verower is, het die afstammelinge van Hassan die amp "sjarief van Mekka" beklee en dikwels ook "koning van Hedjaz". Huidige afstammelige regeer oor die Hasjemitiese Koninkryk Jordanië – dié naam kom van Banoe Hasjim, die subclan van die clan Banoe Qoeraisj, waartoe Mohammed behoort het.