From Wikipedia, the free encyclopedia
Die NG gemeente Plooysburg is ’n gemeente van die Nederduitse Gereformeerde Kerk in die Sinode van Noord-Kaapland.
Die gemeente is in 1920 afgestig as ’n dogtergemeente van NG gemeente Dutoitspan en wel met die naam Duplooysburg. Die gemeente het hy sy selfstandigheid veral aan twee skenkings te danke. Dit was 'n buitekerkplek van Dutoitspan, en laat in die 19de eeu is reeds 'n erf aan die kerkraad gegee om daarop 'n kerk te bou. Die kerk is toe omstreeks die jaar 1880 grootliks deur gemeentelede self gebou wat gratis werk gedoen het. Die geskenk van die erf is in die jaar 1911 gevolg deur die geskenk van die hele plaas, Plooysburg, deur mev. J.J. Maler, aan die gemeente Dutoitspan, met die verstandhouding dat as die wyk Plooysburg selfstandigheid bereik, die plaas aan die nuwe gemeente oorgedra moet word.
In 1920 is die gemeente Duplooysburg toe gestig. Die naam is vroeg in die jare 50 na Plooysburg verander. Hier is dus die interessante verskynsel van 'n gemeente met 'n boereplaas as sentrum. Vanaf die stigtingsdatum van die gemeente het die kerkraad lank gepoog om die plaas te laat verklaar tot dorp, maar altyd is gestuit op die gebrek aan water. Rondom die kerk is talle tuishuisies wat net met kerkgeleenthede bewoon is. Die gemeente het in die beginjare vir 99 persent wat sy ledetal betref, uit boeregesinne bestaan.
Die Rietrivier deel die gemeente geografies in twee en verskaf water aan besproeiingsplase aan sy oewers. Die plaas Plooysburg is op die grootpad tussen Kimberley en Douglas geleë, 72 km vanaf eersgenoemde en 51 km vanaf laasgenoemde. Dieselfde kerkie van die vorige eeu word nog altyd gebruik.
In die tyd van ds. J.N. Geldenhuys (1924 - '29) is hier 'n ruim en gerieflike pastorie gebou. Vanaf sy stigting in 1920 tot 1923 was die gemeente sonder herder, totdat ds. J.H. van Rooyen in daardie jaar gekom het. In 1924 het hy vertrek en in dieselfde jaar het ds. J.N. Geldenhuys gekom.
Ds. S.J. Perold was van 1930 - '35 hier werksaam; ds. P.A. de Wet van 1937 - '42; ds. J.F.D. Oosthuizen het in 1942 gekom, maar gedurende Junie 1943 is die gemeente op 'n Rusdag diep geskok toe hulle vir die erediens reeds kerk toe is en toe moes verneem dat hul herder en leraar skielik vir hoër diens opgeroep is. Hy is opgevolg deur di. D. Krynauw (1944 - '46), S.B. Meyer (1946 - '49), M.B. Brink (van 1950 af).
Die eerste predikant wat die gemeente opgelewer het, was ds. J. du Plessis van onder meer die gemeente Swartland op Malmesbury.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.