Langeberge

Die Langeberge is 'n bergreeks in die suide van die Wes-Kaap wat vir ongeveer 170 km in 'n algemene oos-wes-rigting loop en is deel van die Kaapse Plooigordel. Die mees westelike punt is naby Worcester, en Swellendam is aan die suidelike voet, sowat 35 km ooswaarts geleë. Die reeks eindig sowat 30 km noordoos van Riversdal in die ooste. Die oop vlaktes van Cannaland, 'n streek van die Klein-Karoo, grens aan die noordekant van die Langeberge, en in die suide lê die Agulhasvlakte en die graanlande van die Overberg. Teen die suidelike hange van die reeks kom bergfynbos en proteas voor.

'n Berglandskap in die Grootvadersbosch-natuurreservaat

Langeberge

Die hoogste punt van die reeks is die Keeromsberg met 'n hoogte van 2 075 m. Dit is aan die westepunt tussen Worcester en De Doorns geleë, en sluit by die Kwadouwsberg aan. Die Keeromsrivier ontspring aan die hange daarvan, en word in die Keeromdam opgedam. Die Nuyrivier vloei uit hierdie dam deur die Waaikloof, om by die Breederivier aan te sluit. Aan die oostekant van die reeks vloei die Gouritsrivier suidwaarts deur Die Poort, 'n diep kloof in die Langeberge.

Bergpasse van die Langeberge

Bergpasse oor die Langeberge sluit in:

• Garciapas tussen Riversdal en die Klein-Karoo
• Kogmanskloofpas tussen Ashton en Montagu
• Tradouwpas tussen Swellendam en die Klein-Karoo
• Cloetespas, tussen Mosselbaai en Ladismith