Dr. Johannes Rudolf Albertyn (Riversdal, 6 Augustus 1878 - Kaapstad, 14 November 1967) was 'n leraar in die Nederduitse Gereformeerde Kerk en 'n kenner op die gebied van armesorg en welsyn.
| Johannes Rudolf Albertyn | |
 | |
Ds. J.R. Albertyn | |
| Naam | Johannes Rudolf Albertyn |
|---|---|
| Geboorte | 6 Augustus 1878 Riversdal, Kaapkolonie |
| Sterfte | 14 November 1967 Kaapstad, Kaapland |
| Kerkverband | Nederduits Gereformeerd |
| Gemeente(s) | Willowmore, Kimberley |
| Jare aktief | 1906-1956 |
| Kweekskool | Kweekskool, Universiteit Stellenbosch |
Albertyn behaal die BA-graad aan die Hugenote-universiteitskollege op Wellington in 1899 en daarna die graad BD aan die Princeton-universiteit in Amerika. Van 1906 tot 1926 is hy leraar van die NG gemeente Willowmore, waar hy hom beywer vir die opvoeding van behoeftige kinders, en van 1926 tot 1936 leraar van die NG gemeente Kimberley, waar hy werk om verarmde gesinne op te hef.
Van 1936 tot 1949 dien hy as algemene armesorgsekretaris van die Nederduitsch Hervormde of Gereformeerde Kerk in Transvaal en van 1949 tot 1956 sekretaris van die Federale Armesorgraad, wat hy in 1933 gestig het. Hy was ook van 1928 tot 1932 lid van die Carnegie-kommissie van Ondersoek na die Armblankevraagstuk. Die nasionale kongres in 1934 oor die verarming van blankes is deur sy toedoen gehou. As voorsitter van die Kommissie van Ondersoek oor Stadstoestande (1945-'47), skryf hy die verslag Kerk en stad, wat 'n standaardwerk geword en meer as een uitgawe beleef het.
In 1960 volg die publikasie van nog 'n ondersoek, Land en stad. Albertyn het ook 'n magdom artikels vir verskeie joernale geskryf. In 1948 ken die Universiteit van Pretoria 'n eredoktersgraad aan hom toe. Nog 'n eerbewys was toe die kerkraadslede van die Bosveldgedeelte van die NG gemeente Waterberg-Noord in 1944 uit drie voorgestelde name Albertyn kies as die naam van die gemeente wat op die afstigtingsvergadering op 14 Oktober 1944 op Hoornbosch in die huidige provinsie Limpopo gestig is. Dit was nadat dr. Albertyn soveel vir die afstigting van dié destyds hulpbehoewende gemeente beteken het. Vandag is Ellisras die kern van die gemeente.
Albertynshof in Kimberley, wat vroeër as Newton bekendgestaan het, is na hom genoem nadat die inwoners van die township verskuif en die krotbehuising "opgeruim" is.
Lees ook
Bronne
- Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.
- Hofmeyr, George (hoofred.), "NG Kerk 350", Lux Verbi.BM, Wellington, 2002.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
