Avbob (Afrikaanse Verbond Begrafnisonderneming Beperk) is ‘n Suid-Afrikaanse begrafnisonderneming en versekeringsaak.
In 1916 is die Afrikaanse Verbond deur die Nederlander Jacobus Vogelsang in Bloemfontein gestig met die doel om die belange van die Afrikaner in die algemeen te bevorder. Die jaar 1918 was die hoogtepunt van die Spaanse griep in Suid-Afrika en het die Verbond ‘n voorsorgfonds gestig vir sy lede om begrafnisonkoste te dek en die naasbestaandes by te staan.
Die Afrikaanse Verbond neem daarna ‘n sukkelende firma van lykbesorgers in Bloemfontein oor en dit loop in Desember 1921 uit op die stigting van die Afrikaanse Verbond Begrafnisonderneming Beperk, algemeen bekend onder die akroniem Avbob. Dit was een van die Afrikaanse pioniersondernemings in die Oranje-Vrystaat en het langsamerhand takke oor die hele land geopen. Hierdie firma van lykbesorgers het baie gehelp om die Afrikaner by die sakewêreld betrokke te kry. H.H. van Rooijen. ‘n stigterlid van die Afrikaanse Verbond, was die eerste besturende direkteur totdat hy in 1944 deur sy seun, W.J. van Rooijen, opgevolg is. Reeds so vroeg as 1947 het die organisasie al begrafnispolisse aan lede van alle kultuurgroepe in die land verkoop. In 1951 is Avbob omskep in ‘n versekeringsmaatsklapy met sy hoofkantoor in Pretoria.
Die eerste staatsbegrafnis waarby Avbob betrokke was, was in 1922 met die teraardebestelling van genl. Christiaan de Wet. Sedertdien was die firma gemoeid met alle begrafnisse van regerings- en staatshoofde in die land, insluitende die van Nelson Mandela in 2013.
Hierdie stigting lê hom sedert 2012 toe op maatskaplike ontwikkeling. Dit verskaf skoolbiblioteke gehuisves in omgeboude skeepsvraghouers aan sekere gemeenskappe. Deur sy Avbob Poetry Project word daar elke jaar die AVBOB-lykdigkompetisie gehou om goeie gedigte uit alle taalgroepe in die land te verkry. Reeds het daar vier bloemlesings onder die titel I wish I’d said verskyn.
Hendrikus Hermanus van Rooijen (Emmen, Nederland, 21 Desember 1868 – Bloemfontein, 17 Desember 1952) het in 1897 as onderwyser na die Zuid-Afrikaansche Republiek gekom. Later was hy skrywer van skoolhandboeke en sakeman. Ten spyte van sy swaksiendheid, was Van Rooijen gemoeid met ‘n aantal gemeenskapsaksies. Sy betrokkenheid by die georgansieerde onderwyserskorps het uitgeloop op die stigting van die Transvaalse Onderwysersvereniging (die T.O.). Ook was hy ‘n mede-stigter van die Afrikaanse Verbond Spaar- en Voorskotkas, later bekend as Sasbank.
- Dommisse, Ebbe: Fortuine. Die wel en wee van Afrikaner-magnate. Johannesburg: Jonathan Bell, 2012. ISBN 9781868427567
- Swart, M.J. (red.): Afrikaanse Kultuuralmanak. Aucklandpark: Federasie van Afrikaanse Kultuurvereniginge, 1980. ISBN 0-620-04543-4
- Standard Encyclopaedia of Southern Africa, deel 1. Kaapstad: Nasou, 1970
- Wanneer pyn 'n stem kry. Digkompetisie. In: Taalgenoot. Winter 2022
- www.avbob.co.za
- www.avbobpoetry.co.za
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
