From Wikipedia, the free encyclopedia
Asturië (Asturies: Principáu d'Asturies, Spaans: Principado de Asturias, "Vorstedom Asturië") is sedert 11 Januarie 1982 een van die outonome gemeenskappe van Spanje.
 |
 |
|---|---|
| Kaart | |
 | |
| Basiese gegewens | |
| Hoofstad | Oviedo |
| Amptelike taal | Spaans |
| Bevolking | 1 076 896 (1 Januarie 2006)[1] |
| - Aandeel aan Spanje | 2,6 % |
| - Bevolkingsdigtheid | 102 inwoners/vk km |
| Oppervlakte | 10 604 km² |
| - Aandeel aan Spanje | 2,1 % |
| Grootte | Noord-suid: tot by 76 km Wes-oos: tot by 214 km |
| Statuut van Outonomie van | 11 Januarie 1982 |
| President | Javier Fernández |
| Verteenwoordiging in die Cortes Generales | Kongres: 8 setels Senaat: 6 setels |
| Admimistratiewe verdeling | 78 Concejos |
| ISO 3166-2 | ES-O |
Asturië lê in die noorde van die Iberiese Skiereiland in die noordelike uitloper van die Kantabriese Kus (Cornisa Cantábrica) en word in die noorde deur die Kantabriese See, in die suide deur die Kantabriese Berge, in die ooste deur die riviere Deva en Cares en in die weste deur die Eorivierbedding begrens.
Die geleidelike oorgang tussen see en berge het 'n verskeidenheid landskapsvorme met 'n ryk inheemse fauna en flora geskep, terwyl Asturië ook vir sy historiese erfenis bekend staan. Die Voor-Romaanse boukuns van die gebied is deur die Unesco as 'n wêrelderfenis gelys. Bestanddele van hoë gehalte en bekende plaaslike spesialiteite soos Sidra (Asturiese sider) het Asturië se kookkuns op die gastronomiese wêreldkaart geplaas.
Die Kantabriese Berge (Cordillera Cantábrica) vorm Asturië se natuurlike grens met die provinsie León in die suide. In die oostelike bergreeks rys die bergspitse in die Nasionale Picos de Europa-park tot 'n maksimale hoogte van 2 648 meter (Torrecerredo). Die Kantabriese Berge strek oor 'n lengte van sowat 200 kilometer en loop tot by die provinsies Galicië in die weste en Kantabrië in die ooste. Hulle bestaan merendeels uit kalkgesteentes en behels naas die Picos de Europa nog ander parke soos die Parque Natural de Redes in die ooste, die sentraal-geleë Ubiñas suid van die hoofstad Oviedo, en die Parque Natural de Somiedo in die weste.
Buitelugaktiwiteite soos stap, bergklim, skisport en staptoere na die plaaslike grotte is volop in die gebied. Die nabygeleë kusgebiede pronk met 'n verskeidenheid landskapsvorme soos honderde strande, inhamme en natuurlike seegrotte. Die meeste strande is sandstrande soos die Playa del Silencio ("Strand van Stilte") naby die vissersdorp Cudillero (wes van die stad Gijón) en die strande van die vakansieoord Llanes, waaronder Barro, Ballota en Torimbia. Baie strande word deur steil rotswande met weivelde op hul spitse begrens.
Net soos ander gebiede in die noordweste van Spanje het Asturië 'n klimaat met vier verskillende seisoene. Die somers is in die algemeen warm en vogtig met baie sonskyndae, alhoewel daar ook reënvalle aangeteken word. Die winters is relatief mild, alhoewel daar ook kouefronte voorkom. Die kwik daal veral in die berge gereeld benede vriespunt, sodat die berggebiede tussen November en Mei met 'n sneeulaag bedek is. Reën en sonskyn is tipiese weerspatrone van die Asturiese winter.
Orals in Asturië word daar jaarliks meer as 900 millimeter se neerslae aangeteken, en die totale reënvalle kan in die binneland selfs nog hoër wees en bereik hul maksimum met 1 800 millimeter in die Picos de Europa. Asturië maak sodoende deel uit van die sogenaamde Groen Spanje.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
