Reënboog

'n Reënboog is 'n boog van gekleurde lig wat ontstaan wanneer die son teen 'n waterdruppel skyn en die wit lig dan deur middel van ligbreking in die volledige kleurspektrum opgebreek word. Die middelpunt van die reënboog staan reg teenoor die son en die boog het 'n straal van ongeveer 42°. Die kleure van die reënboog is, van buite na binne, rooi, oranje, geel, groen, blou, indigo en violet.

'n Reënboog sigbaar oor Collado Villalba, Madrid, Spanje.

Verklaring

Die reënboog word veroorsaak deur die ligbreking van sonlig wat deur 'n waterdruppel skyn. Die lig breek wanneer dit die waterdruppel binnegaan, en nogmaals wanneer dit die waterdruppel verlaat, net soos in 'n prisma. Die verskillende kleure in die wit sonlig breek met verskillende hoeke, wat 'n spektrum oplewer. Die hoek waaronder die lig breek is nie afhanklik van die grootte van die druppel nie, maar wel van die brekingsindeks daarvan. Seewater het 'n groter brekingsindeks as vars water, dus het reënboë oor seewater 'n kleiner straal as reënboë deur reënwater. Die reënboog is ook sigbaar in 'n fontein of in die water wat uit 'n tuinslang spuit.

Die reënboog is altyd teenoor die son te sien, dus as jy die son agter jou het. In werklikheid staan die waarnemer met die son en die middelpunt van die reënboog op 'n reguit lyn. Die plek van die reënboog is daarom vir elke waarnemer verskillend.

Beeldegalery

• 
  'n Reënboog te Wicklow
• 
  Reënboë kan ook by watervalle waargeneem word, waar die sonlig deur die mis in die lug skyn en deur ligbreking in die waterdruppels 'n reënboog vorm, soos hier gesien by die Takakkaw Watervalle, Kanada.
• 
  'n Beeld van 'n reënboog waarvan die kontras verhoog is.
• 
  Reënboë op die Amerikaanse kus.
• 
  Die punt van 'n reënboog te Jasper National Park, Alberta, Kanada.
• 
  'n Reënboog deur NASA afgeneem.
• 
  'n Reënboog oor seewater.
• 
  'n Reënboog oor Seepunt, Kaapstad in Mei 2012.

Sien reënboog in Wiktionary, die vrye woordeboek.