Malgas (eiland)

Malgas is 'n eiland in Saldanhabaai net wes van Langebaan. Dit het bekend geraak as ryk bron van ghwano. Hierdie eiland is 8 km² groot, bewoon en sedert 1986 deel van die Weskus Nasionale Park. Die kolonie malgasse (Morus capensis) op die eiland is die grootste in die wêreld.

Malgas
Lugfoto van Saldanhabaai. Malgas is die eerste eiland aan die linkerkant soos mens die baai invaar.
Geografie
Ligging	Suid-Afrika, Atlantiese Oseaan
Koördinate	33.0528°S 17.9253°O / -33.0528; 17.9253
Oppervlakte	8 vk km
Administrasie
Suid-Afrika
Provinsie	Wes-Kaap

In 1601 het dit die Nederlandse seevaarder Joris van Spilbergen al opgeval hoe dig bevolk met robbe en voëls die eilande in Saldanhabaai is. Kort hierna kom Franse pelsjagters om die eilande te eksploiteer en beskou dit as Franse eiendom. Sansy-eiland was hul grootste bron. In 1648 sterf die Fransman l’Ecluse hier. Kort na Van Riebeeck se vestiging aan die Kaap stuur hy kapt. Sijmon Turver na die pelseilande om hulle as VOC-eiendom te annekseer. Turver herdoop Sansy-eiland in 1656 tot Malgasseneiland.

Toe in die middel van die 19de eeu besef word dat ghwano 'n goeie bemestingstof is, word met hernieude belangstelling na die eilande gekyk. Op Malgas was die eeue-oue neerslae soms tot 20 m dik. Tydens die opgrawings is die lyk van l’Ecluse in 'n besonder goeie toestand aangetref omdat die ammoniuminhoud van ghwano as 'n kragtige preserveermiddel optree.

Die Suid-Afrikaanse Nasionale Parke reël begeleide toere na die eiland.

Sien ook

• Lys van eilande van Suid-Afrika