Galbraith Lowry Cole

Sir Galbraith Lowry Cole (1 Mei 1772 - 1842) was die vyfde Britse goewerneur van die Kaap die Goeie Hoop, opvolger van lord Charles Somerset en voorganger van sir Benjamin D'Urban.

Sir Galbraith Lowry Cole
Sir Galbraith Lowry Cole in 1834 deur William Dyce
Geboortedatum	1 Mei 1772
Geboorteplek	Dublin, Koninkryk van Ierland
Sterfdatum	4 Oktober 1842 (70 jaar oud)
Sterfplek	Highfield Park, Hampshire, Engeland
Lojaliteit	Verenigde Koninkryk
Diens/Tak	Britse leër
Jare in diens	1787–1833
Rang	Generaal
Eenheid	27th (Inniskilling) Regiment of Foot
Poste beklee	4de Divisie
Veldslae/oorloë	Skiereilandse Oorlog
Toekennings	Knight Grand Cross, Order of the Bath
Ander werk	Goewerneur van Mauritius (1823-1828) Goewerneur van die Kaapkolonie (1828-1833)

Cole is in Ierland gebore. Hy dien eers as goewerneur van Mauritius van 1823 tot 1828 totdat hy na die Kaap die Goeie Hoop verplaas word. Tydens sy bewind vind belangrike gebeure plaas, waaronder die herverskyning van die eens verbode South African Commercial Advertiser, die stigting van die Suid-Afrikaanse Kollege (later die Universiteit van Kaapstad en SACS) en die bou van nuwe paaie, byvoorbeeld die pad deur die pas wat na Cole genoem is, die Sir Lowryspas.

Cole het veel moeite gehad om die oproerige stamme aan die Oosgrens te bedwing. Teen 1820 is talle reuse-plase in die latere distrik Colesberg aangelê en in 1822 vra boere die regering om 'n dorp op die perseel van die verlate sendingpos van die Londense Sendinggenootskap te stig. Die owerheid staan op 27 Januarie 1830 sowat 15 500 hektaar aan die Nederduitse Gereformeerde Kerk toe en so ontstaan Colesberg, genoem na Cole. Die NG gemeente Colesberg het drie jank lank na sy ontstaan in 1826 as "Torenberg" (verkeerde spelling van "Toverberg") bekend gestaan, maar dit staan reeds meer as 180 jaar lank bekend as Colesberg.

In 1833 tree hy af en sterf nege jaar later.

Sien ook

• Lys van kommandeurs en goewerneurs van die Kaapkolonie

Bron

• Rosenthal, Eric, 1978. Encyclopaedia of Southern Africa. Cape Town and Johannesburg: Juta and Company Limited.