Faisal II van Irak
Koning van Irak van 4 April 1939 tot Julie 1958 / From Wikipedia, the free encyclopedia
Faisal II (2 Mei 1935 - 14 Julie 1958) was van 1939 tot 1958 die laaste Irakse koning. Hy was 'n kleinseun van die beroemde koning Faisal I.
Faisal II van Irak | |
---|---|
Koning van Irak | |
Faisal II van Irak | |
Vorstehuis | Hasjemite |
Titels | Koning van Irak |
Regeer | 4 April 1939 – 14 Julie 1958 |
Voorganger | Ghazi I |
Monargie afgeskaf | Muhammad Najib Ar-Ruba'i |
Volle naam | Faisal bin Ghazi bin Faisal bin Hussein bin Ali |
Gebore | 2 Mei 1935; Bagdad, Irak |
Oorlede | 14 Julie 1958; Bagdad, Irak |
Vader | Ghazi I |
Moeder | Aliya bint Ali |
Godsdiens | Soenniete Islam |
In 1939 volg hy sy vader koning Ghazi (1912-1939) op wat in 'n motorongeluk gesterf het.
As 'n tiener het Faisal skoolgegaan by Harrow Skool in die Verenigde Koninkryk saam met sy neef die latere Koning Hussein van Jordanië. Die seuns was maats en het klaarblyklik selfs beplan om hulle twee koninkryke saam te laat smelt om die bedreiging van militante pan-Arabiese nasionalisme teen te staan.
Tot met 2 Mei 1953 was Irak onder regentskap van Faisal se oom, Prins Abdullah (1913-1958). Selfs nadat hy meerjarig verklaar en ingehuldig is as koning van Irak bly die mag grootliks nog in die hande van Prins Abdullah.
In April 1941 word 'n staatsgreep deur pro-nasionalistiese offisiere onder leiding van Rasjid Ali geloods. Die staatsgreep word gesteun deur die antisemitiese en pro-nazistiese "Goue Vierkant"-organisasie. Die koning moes saam met sy moeder na Transjordanië vlug, maar kon na die onderdrukking van die staatsgreep met behulp van die Britte terugkeer.
Op 1 Februarie 1958 het Irak se buurstaat Sirië by President Gamal Abdel Nasser se Egipte aangesluit om die Verenigde Arabiese Republiek te vorm. In reaksie hierop het die twee Hasjimitiese koninkryke hul eie posisie versterk deur 'n soortgelyke alliansie te vorm. Twee weke later op 14 Februarie word die Arabiese Federasie van Irak en Jordanië gestig met Faisal, as die senior lid van die Hasjimitiese familie as die hoof van die staat.
Op 14 Julie 1958 loods nasionalistiese soldate 'n staatsgreep. Die koninklike villa in Bagdad waar Faisal met die koninklike familie woon, word deur die opstandige soldate bestorm. Bykans die totale koninklike familie word in die tuin byeen gedwing en vermoor, insluitende koning Faisal. Die lyk van die gehate Prins Abdullah word in triomf deur die strate gesleep en verbrand. Die omvang van die moorde op die koninklike familie het enige toekomstige terugkeer van 'n monargie in Irak vir alle praktiese rede onmoontlik gemaak.