![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/7f/Ch%25C3%25A2teau_Frontenac01.jpg/640px-Ch%25C3%25A2teau_Frontenac01.jpg&w=640&q=50)
Château Frontenac
From Wikipedia, the free encyclopedia
Die Château Frontenac, 'n luukse hotel wat in 'n kasteelagtige styl ontwerp is en tans deur die Kanadese hotelketting Fairmont Hotels and Resorts bedryf word, is een van die bekendste besienswaardighede in Quebecstad, die hoofstad van Kanada se Franssprekende provinsie Quebec. Danksy die ligging op 'n hoë krans bied die hotel 'n voortreflike uitsig oor die stad en die Sint-Laurensrivier.
![Thumb image](http://upload.wikimedia.org/wikipedia/commons/thumb/4/46/Chateau_Frontenac_cds.jpg/640px-Chateau_Frontenac_cds.jpg)
![Thumb image](http://upload.wikimedia.org/wikipedia/commons/thumb/7/7f/Ch%C3%A2teau_Frontenac01.jpg/640px-Ch%C3%A2teau_Frontenac01.jpg)
Die Château Frontenac was een van die eerstes in 'n hele reeks hotelle wat deur die Kanadese spoorwegmaatskappy Canadian Pacific / Canadien Pacifique aan die einde van die 19de en begin van die 20ste eeu volgens die ontwerpe van die Amerikaanse argitek Bruce Prince opgerig is. Dit het sy deure in 1893 vir gaste geopen. Die spoorwegmaatskappy was van voorneme om met die nuwe hotelle die luukse toerisme te bevorder en die belangstelling van welgestelde reisigers vir sy treindienste te wek. Wat sy boustyl betref, is die Château Frontenac nou verwant aan die Château Lac Louise aan die oewer van Alberta se Louisemeer.
Die Château Frontenac dra sy naam ter ere van Louis de Buade, graaf van Frontenac, wat in die tydperk tussen 1672 en 1682 en vir 'n tweede ampstermyn tussen 1689 en 1698 goewerneur van die kolonie Nieu-Frankryk was. Die hotel is op die plek opgerig waar Frontenac teen die einde van die 17de eeu met die bou van die Citadelle de Québec begin het.
Die hotel het in die 20ste eeu talle wysigings ondergaan, waarvan die byvoeging van die toring deur die argitekte Maxwel in 1926 die belangrikste was. Die toring het sedertdien 'n bekende baken van die hotel en die Quebecstad geword.
Die Konferensie van Quebec, wat in 1943 gehou is en waartydens Winston Churchill en Franklin D. Roosevelt stategieë vir die Tweede Wêreldoorlog bespreek het, het in die Citadelle van Quebec plaasgevind, terwyl die personeel oorwegend in die Château Frontenac gehuisves is.