![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/5/5f/Shrimp_gumbo.jpg/640px-Shrimp_gumbo.jpg&w=640&q=50)
Cajun-kookkuns
From Wikipedia, the free encyclopedia
Cajun-kookkuns (Frans: Cuisine cadienne [kɥizin kadjɛn]) is 'n sambreelterm vir die kooktradisies wat eie is aan die Acadiana-streek van die Amerikaanse deelstaat Louisiana. Dié oorwegend landelike kookkuns, wat deur Franssprekende Cajuns ná hulle verdrywing uit Akadië in Oos-Kanada na die Mississippi-rivierdelta saamgebring en aan plaaslike besonderhede aangepas is, maak hoofsaaklik gebruik van plaaslik beskikbare bestanddele en verskil merkbaar van Louisiana se twee ander kooktradisies, die meer gesofistikeerde Kreoolse kookkuns in stedelike gebiede soos New Orleans wat sy oorsprong in Franse en Spaanse eetgewoontes het, en die tradisionele Anglo-Amerikaanse Suidstate-kookkuns van Noord-Louisiana.
![Thumb image](http://upload.wikimedia.org/wikipedia/commons/thumb/5/5f/Shrimp_gumbo.jpg/640px-Shrimp_gumbo.jpg)
![Thumb image](http://upload.wikimedia.org/wikipedia/commons/thumb/0/08/Cajun_trinity_HRoe_2012.jpg/640px-Cajun_trinity_HRoe_2012.jpg)
Verskille tussen die drie bogenoemde tradisies het al lank begin vervaag. 'n Outentieke Cajun-maaltyd word tradisioneel in drie kookpotte berei: een vir die hoofgereg; een vir gestoomde rys, besondere soorte worsies of seekos; en die derde vir 'n groentedis wat van seisoenale gewasse berei word. Garnale (shrimps) en varkwors is Cajun-stapelkosse wat vir 'n verskeidenheid geregte gebruik word.
Cajuns kook geurig met kruie en speserye. Drie fyngekapte geurige groentes en kruie - groen soetrissies (green bell pepper of poivron in Frans), uie en seldery - staan sentraal in die meeste disse sodat Cajun-sjefs na hulle skertsend as die "Heilige drie-eenheid" (Holy Trinity) van hul kookkuns verwys, vergelykbaar met die mirepoix-mengsel van fyngekapte uie, seldery en worteltjies in Frankryk se tradisionele kookkuns. 'n Vierde spesery, knoffel, word as die "pous" van Cajun-kookkuns beskou.