Andromeda (mitologie)

Andromeda (Antieke Grieks: (νδρομέδη of νδρομέδα) is 'n figuur uit die Griekse mitologie. Sy is die dogter van Kefeus en Kassiopeia, die koning en koningin van die Ethiopiërs, en is as 'n sterrebeeld aan die hemelruim geplaas.

Andromeda, vasgeketting aan 'n rots.

Mite

In die Griekse mitologie word Andromeda deur die held Perseus gered uit die kloue van Ketos, 'n seemonster, waaraan sy geoffer is omdat haar moeder beweer het sy is mooier as die Nereïdes, die dogters van Nereus. As straf vir haar verwaandheid stuur Poseidon die seemonster Ketos. Die orakel vertel vir Kefeus dat die monster sal verdwyn as hy Andromeda aan hom offer.

Perseus het pas vir Medusa verslaan en reis met sy gevlerkte perd, Pegasus, aan Ethiopië se kus toe hy Andromeda aan die rots vasgeketting sien met 'n enkele sieraad as kledingstuk. Hy raak dadelik verlief, red Andromeda en neem haar terug na haar ouers, die huilende Kassiopeia en Kefeus, nadat hy Ketos verslaan het.

In ruil vir sy heldedaad sou hy met Andromeda trou. Andromeda se ouers gee hul seën daarvoor. Andromeda is egter vroeër reeds aan die broer van Kefeus, Fineus, as bruid belowe en daarom eis Fineus haar op tydens haar bruilof. Toe Kefeus en Kassiopeia hul belofte aan Perseus terugtrek en Fineus se kant kies, breek daar 'n geveg uit. Perseus neem die afgekapte kop van Medusa in sy hand en versteen daarmee al sy vyande.

Andromeda staan aan Perseus se sy en skenk die lewe aan talle kinders. As beloning vir haar trou word sy deur Zeus in die hemel geplaas. Die  sterrebeeld Andromeda word na haar vermoem. Ook ander rolspelers kry 'n plek aan die sterrehemel, maar Kassiopeia word vanweë haar verwaandheid onderstebo in die lug geplaas.

Andromeda het talle kinders gehad, waaronder Perses wat in Ethiopië gebore is en by sy oupa grootgeword het. Hy het die stamvader van die Persiese konings geword. Daarbenewens het sy die lewe geskenk aan Alkaios, Sthenelos, Elektrion, Heleios en Mestor, en aan haar dogter Gorgofone. Sy is die ouma van Alkmene, Euristeus en Amfitrion en dus 'n voorouer van die Telebo-koning Pterelaos en van Herakles.

Verwysings

1. ↑ Ovidius , Metamorfoses 4,738; Biblioteek van Apollodorus 2,4,3; Hyginus 64.
2. ↑ Biblioteek van Apollodor 2,4,3.
3. ^ Higinus 64.
4. ↑ Pausanias 4,35,9.
5. ^ Higinus 64: Agenor
6. ↑ Ovidius, Metamorfoses 5,242; Biblioteek van Apollodorus 2,4,3.
7. ^ Arat , Fainomena 197-201.
8. ↑ Biblioteek van Apollodor 2, 4, 3 en 5.